黃楚喬 《大選美》

黃啟裕：

呢張畫除咗背景有一個古畫之外，前面有一名女士，穿著類似英國宮廷嘅衣服，有貴冠有緞帶，寶藍色上面有好多徽章。呢個同達文西嘅蒙羅麗莎相似，呢幅畫係一個中西合壁嘅做法，人物較為現代，背景係清朝嘅畫做個對比。

旁述：

黃啟裕喺1990年代加入攝影雜誌《娜移》成為編委之一，同攝影師李家昇、黃楚喬、劉清平、李志方一齊共事，對於當時概念攝影嘅興起同埋香港攝影師黃楚喬嘅創作都有唔少親身經歷。佢認為呢幅相結合文化、歷史同美學，喻意香港嘅歷史性過渡。

黃啟裕：
楚喬非常聰明地將個跑馬圖案放喺左邊手臂上 ，好似圖騰一樣或紋身。果隻馬正跑向畫嘅東面，有啲喻意香港正在走向東方。

旁述：
呢幅係黃楚喬喺香港九七回歸前後嘅創作，係對於香港喺迎接呢個重要歷史時刻嘅想像。佢係數碼合成攝影嘅先驅之一，《大選美》嘅背景就係挪用清朝宮廷畫家郎世寧嘅畫，再以數碼技術處理加入攝影人像而成。

黃啟裕：

楚喬不論喺商業攝影同埋藝術攝影都係其中一個好重要嘅女攝影師 ，當年其實商業攝影師，如果有女性都係外國、西人。佢同李家昇共用一個工作室做商業攝影為生。楚喬主要拍攝人像，而李家昇主要拍攝靜物。喺商業攝影來講，黃楚喬拍過一張著名嘅就係電影《英雄本色》個海報。周潤發、狄龍以及張國榮側面果張就係楚喬嘅作品。

最重要就係佢哋夫婦二人喺公餘， 1992 到2000年時做咗一本名為《娜移》嘅雜誌，娜移有幾個意思，係乾坤大娜移嘅意思，將某些東西扭轉；或者係有啲借用嘅感覺。呢種做法將他人嘅元素轉做其他新嘅作品就是係楚喬這張《大選美》嘅主要導向。

旁述：

當年嘅數碼技術仲未普及，黃啟裕記得嗰時菲林仍然流行，因為咁攝影師之間嘅交流發生好多趣事。

黃啟裕：

因為[19]90年代係未有任何Facebook以及其他數碼媒介，所以我們 一定要面對面去結識攝影師，我哋嘅雜誌有一個活動名為 Photographer’s Monday，星期一攝影師聚會每個月第一個星期一晚，我哋會係中環某餐廳去見攝影師，因為當年未有數碼，每個人都會攞一盒相片出席。我哋會邊喺酒樓食飯、邊戴白手套揭相。就好似我哋喺酒樓片皮鴨咁款，嗰時相當有趣。

旁述：

呢件作品嘅名稱係《大選美》，係黃楚喬大約喺1997年創作嘅彩色照片，圖像高118.4厘米，長87.7厘米；連框就高134厘米，長103.5厘米，厚4.8厘米。

作品影住一位年青女子嘅上半身，背景係一幅中國古畫。整個畫面泛黃，而且佈滿幼細裂紋，睇落好似一幅年代久遠嘅油畫。

年青女子微微側身向8點鐘方向，三七面望向我哋微笑。佢頭戴鑽石皇冠，啡色微曲嘅短髮梳理得整齊貼服。女子有一張瓜子面，雙頰飽滿，眉頭揚起，加上描畫嘅眼線，佢對雙眼皮眼睛睇起嚟明亮有神。女子低鼻樑，帶有一個小巧嘅鼻，一張紅唇合上淺笑，唇形飽滿，整體神態平和優雅。佢戴珍珠耳環同珍珠頸鏈，着住象牙白色嘅吊帶貼身絲質裙，前襟釘有珍珠串飾。佢嘅左肩搭住一條寶藍色肩帶，打斜跨到身體右側，肩帶上扣住三個鑲咗寶石嘅勳章，其中兩個用絲帶蝴蝶結襯底。

偏黃嘅背景係清朝古畫《馬術圖》嘅局部，下方近景同上方遠景有樹，樹冠混雜咗綠色、粉紅色同白色。喺背景嘅左上角，即年青女子嘅額角旁邊，整齊咁企咗大約二百幾人，佢地高舉旗幟。一隊六個人騎住馬喺人群中飛奔而出，有將士舉住一個人喺頭頂，又有將士企喺馬背上面。將士縱馬馳騁，以弧形路線跑向右下方，去到年青女子右肩嘅位置。而女子嘅左上臂有一個紋身，圖案係一個向住右下方策馬前進嘅將士，呢個將士紋身嘅繪畫手法、色調同方向，都同背景嘅將士一致，佢就好似一位將領，帶領住後面六位騎士，縱馬策騎到女子嘅手臂上面。