收聽
M+ 希克藏品，香港，© 耿建翌，圖片：M+，香港
旁述：
當你望住耿建翌嘅呢件作品嗰陣有咩感覺？四塊板上面展示四張剪裁得啱啱好嘅面孔，都係笑笑口咁，對住我哋大笑。但係，呢幅作品就只係關於笑？
區永東：
你見唔見到眼眉側邊有啲皺紋呀？呢個係皺眉嘅表情，笑嗰陣係唔會有嘅 。皺眉通常係用嚟表達憂傷、恐懼同憤怒。呢點其實令我奇怪，究竟佢想表達咩嘢感受？佢係咪仲想話俾我哋知呢種感受其實有咩意思？呢個錯綜複雜嘅表情好有趣。
旁述：
呢個係區永東，佢係心理學教授。我哋問過佢：人嘅天性係點樣表達情緒同回應其他人面部嘅表情。
區永東：
一般人以為當我哋感受到一啲嘢就會用表情展示，情緒係會決定我哋點樣表達情感。但其實呢樣係可以調轉㗎。如果我哋擺出唔同嘅情緒同表情，原來都可以影響番我哋嘅感受。即係話，如果做出扮開心嘅笑容，你會更加容易感到快樂；當你擺出一副愁眉苦臉，就更加容易憂傷。呢樣我哋稱之為「臉部回饋系統」。
旁述：
由此可見，情感同面部表情嘅關連，複雜又有趣。再睇番耿建翌將快樂同憤怒兩種對立表情放埋一齊嘅作品，你依家有咩感受？會唔會令你對呢個「人」嘅情感有唔同嘅領會？
旁述：
呢件作品嘅名稱係《第二狀態》，係1987年耿建翌創作嘅油彩布本作品，一組四張黑白畫作，每張都係直幅，各高170厘米、長130厘米。
四張畫都係描繪同一位男士嘅大頭，佔滿全個畫面，呢啲大頭大過真人，約有一個成人咁高。呢位男士係藝術家本人，佢展現出一連串表情，係四個唔同嘅笑容。畫作描畫細緻，畫面瀰漫灰暗色調。
四張畫作嘅背景都係漆黑一片，畫中只見全塊面由額頭到下巴嘅部分，無頭髮，耳仔同頸隱沒喺漆黑嘅背景之中，呢四塊面睇起嚟就好似面具。喺每張畫作中，額頭佔上方三分之一，眼、鼻、兩頰為中間三分之一，咀同下巴為下方三分之一。男士笑到見牙唔見眼，佢揚起兩堂眉毛，眉心打摺，兩眼瞇成一條線，眼角有一條條魚尾紋；佢同時翁起個鼻，擘大口，露出上排牙齒同埋舌頭。光源嚟自畫嘅左邊，所以左邊面比右邊面光亮。鼻翼到嘴角嘅表情紋有深色陰影。
呢四張笑臉似係連環動作，面部有微細嘅表情變化，皮膚嘅緊繃程度、皺紋嘅多寡都各有不同。男士由一開始露齒大笑，到逐漸擘開個口，大到可以見到舌頭嘅根部，而喉嚨就似一個黑洞，暗沉無光。