攝影：林煒然，圖片由M+提供
旁述：
呢件作品嘅名稱係《無題》，係陳光武喺1995年創作嘅水墨紙本作品，高約180厘米，闊約97厘米，約一道門咁大。
離遠睇，作品似有深淺不一嘅墨，喺紙上拖拉出一道接一道垂直嘅痕跡。墨跡幾乎填滿整個畫面，而墨色嘅濃淡變化，似乎反映咗畫家運筆時自然流暢嘅一呼一吸，起筆處墨色較濃，收筆處墨色較淡。
靠近睇會發現，墨跡係藝術家反覆以緩慢嘅運筆，喺紙上點出濃淡不一嘅墨色，由濃到淡，帶有節奏咁交疊同分隔。呢啲連綿嘅墨點，好似一串串水珠，由上而下慢慢流淌，又似逆流快速上湧。而墨點之間嘅交疊同留白，就似輕撥珠簾時，珠串微微晃動嘅動態。
藝術家陳光武將漢字結構，拆解成點、線條同筆畫，將書法轉化成只有視覺符號嘅畫面。佢透過專注於刻畫墨跡肌理嘅過程，讓內心獲得沉澱同平靜。