林明弘 《無題 （休息抽根菸）》

姚嘉善：

林明弘係一位台灣藝術家，他喺日本出世，喺台灣同美國長大。

旁述：
姚嘉善係M+嘅視覺藝術主策展人，亦係林明弘嘅好朋友。

姚嘉善：

佢喺加州嘅藝術學校學畫畫，之後返咗台灣，同一班藝術家合作。當時佢喺一個藝術空間裏面做調酒師。嗰度係一個好互動嘅環境，佢仲可以做自己嘅創作。然後佢開始喺嗰個地方做展覽，而呢件名為《無題（休息抽根煙）》嘅作品，就係佢喺嗰個藝術空間嘅早期展覽之一。

佢就係咁開始用呢啲紡織圖案去創作。我諗佢對呢啲圖案點樣講述台灣某種歷史，以及呢啲裝飾藝術或紡織圖案又點樣表現台灣嘅傳統，相當之著迷。

喺呢段時間，佢嘗試點樣利用空間感去處理呢啲圖案、同呢個立方空間產生對話。你知畫廊係一個白色嘅立方體，呢點相當重要，因為將一啲顏色鮮艷、五彩繽紛嘅花花圖案並置，俾人一種好私密嘅家居感覺。而將佢哋放響充滿現代性嘅藝術空間裏面，就形成一個強烈嘅對比。

佢亦都喺度創造緊一個社交空間。所以，佢唔單只用呢啲圖案同環境對話，仲有利用傢俱同圖案產生嘅連繫 ，同時形成一種三維同二維之間嘅變奏。佢對呢種處於公共和私人之間、甚至兩樣都唔係嘅過渡空間非常感興趣。

不過，有一樣嘢係成個裝置嘅關鍵，就係個煙灰缸。我認為佢有畫龍點精嘅效果。如果冇咗呢個煙灰缸，咁呢度就只係得返兩張梳化，變成一件完全唔同嘅作品。 作品可以產生非常有趣嘅對話，關於二維或者三維嘅圖案、空間嘅表面等等，但個煙灰缸將佢提升到另外一個層次，令成個空間加強咗人嘅存在感同互動嘅元素。

我覺得呢個作品好有吸引力，我鍾意藝術家只係加咗少少嘢，就可以扭轉甚至改變整個作品。

旁述：

呢件作品嘅名稱係《無題（休息抽根菸）》，係林明弘喺1999年創作嘅裝置作品，物料包括梳化、金屬煙灰缸同乳膠漆木板，尺寸視乎組裝方式同展示空間而定。

作品設置喺空間嘅一個角落，垂直嘅牆身為白色，左邊牆同右邊牆嘅前面各自有一張米白色單人梳化；兩張梳化之間放咗一個長筒形座地煙灰缸，煙灰缸由金屬製造，呈銀灰色。梳化背後兩幅牆上有五幅掛畫，全部都帶有鮮艷嘅桃花圖案。而呢啲圖案，亦出現喺梳化嘅布椅套上。

呢兩張梳化都係改裝自柯比意設計嘅LC-2扶手椅，外形係一個立方體，每邊大約60厘米長。梳化以銀色金屬幼管作為骨架，內嵌五塊方形厚身軟墊，軟墊拼合成梳化嘅靠背、兩邊扶手同雙層座墊。軟墊嘅布椅套主要係米白色，但係零零舍舍有一個椅套印有桃花圖案；其中一張梳化嘅桃花圖案出現喺右邊扶手，另一張就喺座墊。所有布椅套都微微偏黃，帶有殘舊感。

兩張梳化之間嘅長筒形座地煙灰缸，高度同梳化差唔多，筒身有一個圓闊嘅開口，頂部係煙灰缸，缸內留有煙頭。

牆上五幅方形嘅掛畫尺寸不一。左邊牆展示咗三幅，佢哋嘅闊度同梳化相若，當中兩幅係正方形，另一幅比較長，係長方形。而喺右邊牆，就有兩幅尺寸更大嘅正方形掛畫。

掛畫上嘅圖案以乳膠漆繪畫。粉紅色底色上有一朵朵桃花，每朵桃花都比人頭大，桃花連續排列成幾道斜行，一行紅色一行米白色，兩色相間，顏色鮮豔。近睇，會見到粉紅色背景同所有桃花都佈滿白色空心小圓點。每朵桃花有五片線條圓潤嘅花瓣，綑白色邊。花蕊由五個水滴形狀組成，水滴嘅尖端指向中心點。紅色花瓣配黃色花蕊，米白色花瓣配紫色花蕊。呢啲圖案，同梳化椅套上嘅圖案相同，但尺寸較大。遠睇，五幅掛畫就好似五塊花布，由同一幅巨型布料裁剪而成。