胡曉媛 《無題》

旁述：

呢啲精細描繪嘅木紋，對藝術家胡曉媛嚟講，係一個生命嘅傷痕。

胡曉媛：

我見到一個好似係被遺棄嘅木樁嗰陣，因為佢哋用呢種非常巨大嘅切割電鋸，所以喺切割佢呢個橫切面嘅時候，其實切得非常混亂，刀口非常深，而且非常縱橫、交錯，佢當時睇起上嚟有一種傷痕割裂嘅感覺。

當我將呢塊好纖薄，幾乎係半透明、好輕盈嘅呢種綃冚喺佢上面，用墨同毛筆去描繪呢個樹樁上面嘅傷痕，就能夠透現出所有年輪嘅木紋。

旁述：

呢塊畫布用嘅物料叫做綃，以生絲織成，睇起上嚟薄如蟬翼，令人感覺愉悅而且平靜，但係仔細諗佢嘅製造過程，其實充滿暴力。

胡曉媛：

要先將生嘅繭煮死，之後要經過繅絲、抽絲咁樣嘅一個過程，呢啲過程好似係無聲咁。但實際上佢仲係嗰個曾經有生命、生存緊嘅繭嘅個體嘅時候，佢被剝奪咗本來應有嘅一啲嘢。

旁述：

胡曉媛喺美術學院畢業之後無幾耐，發現社會同佢喺學校入面想像嘅並唔一樣，帶住失落嘅情緒，佢開始對於周圍受到暴力對待嘅事物產生深刻嘅共情。

胡曉媛：

我覺得作為一個社會嘅結構，佢嘅暴力永遠存在。但我覺得所有人嘅努力，目的其實就係減緩呢種劇烈嘅痛楚，靠某種潤滑同包裹，令佢變到能夠喺一定限度之內被承受。所以我去包裹一啲事物，我減緩好多呢種矛盾，但同時又揭示呢個矛盾，正正就係我睇呢個世界嘅方法。

旁述：

呢件作品嘅名稱係《無題》，係胡曉媛喺2008年創作嘅雕塑作品，創作物料包括木框同絲，即絲織品嘅絲。作品為一組兩件嘅長方形雕塑，兩件尺寸差唔多，都係高約160厘米，長101厘米。兩件雕塑一左一右並排，掛喺牆身展示。

其中一件雕塑，係一個白色直度長方形木框，掹上一幅淡白色絲織布。絲織布好薄而且通透，布面平整無皺摺。長方形木框每條木條嘅闊度，同一張信用卡嘅短邊差唔多咁闊。木框表面有木紋。靠近睇，疊喺木條上嘅絲織布畫咗啲黑色線條，同絲織布下嘅木紋幾乎一樣。木紋係一條條並排嘅細紋，有啲位置係彎彎曲曲；有啲就一層層、一圈套一圈，似樹木嘅年輪。

另一件雕塑，同樣係一幅淡白色長方形絲織布，薄到近乎透明，佢嘅頂部同末端​​，都分別打橫套住一條樹枝，睇起嚟，好似一幅垂掛喺牆上嘅卷軸咁。絲織布面嘅中間靠上方位置，畫有一個似樹幹橫切面嘅圖像，顯示出樹嘅年輪，佔畫面差唔多一半嘅空間。年輪嘅線條愈向內愈疏，愈向外愈密。成個年輪主要以草綠色描畫，部分位置帶藍色。年輪嘅圈同圈之間，透出絲織布原本嘅淡白色。