M+希克藏品（捐贈），香港，© 謝南星，圖片：M+，香港
旁述：
呢幅畫嘅名稱係《無題（第三號）》，係謝南星喺2004年創作嘅油彩布本作品，高約2.2米，長約3.9米，尺寸大約相當於一道門咁高、四道門並排咁闊。
畫面中央有一大團啡黑色、帶有尖角嘅形狀，佢嘅兩邊同底部覆蓋住一大片蓬鬆嘅啡紅色毛髮，幾乎佔滿成個畫面；而畫面上方有一抹淡淡嘅紫藍色。畫中嘅尖角形狀同毛髮嘅輪廓睇落模糊不清，其實，藝術家係以俯瞰角度同埋超近距離描繪雞頭上凸起嘅肉冠。
藝術家唔想自己嘅創作變得商業化，亦唔想重複自己以往嘅風格，呢啲衝突令佢想回歸本源，探索圖像同觀看嘅本質。佢用冷色調將平凡事物嘅細節放大，去到誇張嘅地步，令人無法辨認出本體嘅形態。透過呢種視覺效果，藝術家想揭示我哋睇到嘅世界從來都唔係真實，同時表現出逃避現實、絕望痛苦嘅情緒狀態。
藝術家創作呢件作品嘅時候，將憤怒嘅雞冠放大，以特寫呈現，猶如一幅抽象畫。帶有尖角嘅肉冠好似一道向左燃燒嘅火焰，肉冠周圍係輕盈飄逸嘅啡紅色雞毛，佔滿畫面兩點至九點鐘方向。一條條紅色、深橙色同深啡色嘅羽毛向唔同方向延伸，中間夾雜白色細絲，睇起上嚟，呢啲羽毛好似豎起緊，微微擺動。