收聽
M+希克藏品（捐贈），香港，© 謝南星 ，圖片：M+，香港
旁述：
謝南星用咗超過半年時間，畫咗呢三幅巨型畫作，但係模糊嘅畫面令佢睇起嚟比較似錄像嘅截圖。
謝南星：
中間作為三聯畫嘅一個主體，佢主要係討論兩車相會嘅時候，有一種就嚟撞車嘅緊迫感，喺嗰一刻有一種危機感。左邊呢一幅，就係兩車交錯之後遠去嘅一個情景，然後右邊就係一個好似喺鄉村入面比較荒蕪嘅湖面。
旁述：
呢個情景發生喺公路，謝南星喺車入面用錄影機拍咗段片，再喺電視機度播，跟住再用影相嘅方式影低電視機畫面，再參考嗰啲圖像，嚟畫成你面前嘅作品。
謝南星：
我特別迷戀低畫質嘅畫面，我覺得呢種模糊化，反而畀人嘅印象係非常接近一種失真狀態，亦都喺一種彷彿感之中。可能呢種方式引起嘅感受更加強烈。反而比起好清楚咁呈現細節，可能有一種更強烈嘅心理反射。
旁述：
呢件作品嘅名稱係《無題（有聲音的圖像I）》，係謝南星喺2001年創作嘅油彩布本，一組三幅，每幅高220厘米，長380厘米。
呢組作品橫向排列成左、中、右三幅，色調都呈灰藍色，景象模糊，似用藍染染印，呈現喺夜晚只靠路面光線、行車時瞬間所見嘅景象。
由左至右，左邊嗰幅係河岸嘅景色，近景係河面，喺畫面嘅下方；中景係樹林，喺畫面中間；遠景似係城巿，喺畫面上方。暗淡嘅河面有一抹抹倒影，倒影似係隔岸嘅一排樹木，呢啲高聳嘅樹木暗沉陰鬱，後方遠景迷濛，帶有點點亮光，似係從城巿中樓宇滲出嘅光影。
中間嗰幅嘅場景係一條行車路。畫面中央靠右、約隔一兩個車位嘅前方，有一部迎面而嚟嘅車，睇唔清係私家車定係的士，車頭燈射出耀眼強光，畫面中央嘅強光留下一圈圈光暈。
右邊嗰幅嘅場景似駛出公路，路面比中間嗰幅寬闊，似有四五條行車線。前方只有一部車喺右邊行車線，似係着住車尾燈向前行駛。沿公路左右兩旁，各有一排路燈，兩排路燈延展到遠處，睇起嚟，似喺畫面中間位置打橫連成一線。部分光影就好似帶住尾巴咁拉長，顏色亦逐漸變淡。公路周邊嘅遠景昏黑一片，分唔清係山、建築物定係雲。
三幅畫作嘅畫面整體光影矇矓，並且有橫向嘅細紋，睇起嚟就似喺電視螢幕播放低像素嘅錄影畫面。