尼古拉斯．帕蒂 《水中倒影》

旁述：

呢件作品嘅名稱係《水中倒影》，係尼古拉斯．帕蒂喺2022年創作嘅畫作，屬於《水中倒影》系列作品嘅其中之一。呢件係喺亞麻布上繪畫嘅粉彩作品，高約99厘米，長約104厘米，厚8厘米。

作品描繪太陽照耀下，崇山峻嶺前，平靜嘅水面映照出山體嘅倒影，山體同水面連成一線。作品整體顏色嘅彩度同配色對比度低，用色淡雅，色調柔和，塗抹無痕，只有細碎而流暢嘅筆觸，帶來絲絨般嘅質感。

畫面上方約四分之三係山體，下方約四分之一係水面。山體聳立喺左右兩邊。左邊嘅山較高，由前到後，似由六重嘅山體組成。山體由低至高排列，山形圓渾飽滿，各有不同形態，有啲山勢起伏和緩，有啲就似拔地而起。山體邊緣帶灰色，顯得每重山層次突出。最前兼最低嘅山體係白色，後兩層係淡紅色，之後較高嘅三層分別係淡綠色、淡藍色同淡灰色。右邊嘅山同左邊嘅形態類似，但整個山體較闊，前後分層亦較多，高度大概係左邊山體嘅五分之四。

兩座山之間有淡淡嘅灰影，似係遠處有另一重山。而橙黃色嘅太陽，就高掛喺兩座山之間嘅天空。山嘅下方，係一片平靜嘅水面，呈淡灰色，愈近山體愈深色。陽光下，水面映照出兩組山體近水面嘅下半部分，倒影透亮，如鏡像對稱。水面嘅中央位置，泛起點點鮮黃嘅光影，光點愈近山體愈細碎，猶如太陽灑下一道光喺水面，形成倒影，而呢個倒影被水面微微起伏嘅波浪打散。水面仲遍佈一抹抹白點，睇起嚟好似整個水面泛起微細嘅波紋，映襯住水中嘅崇山。