藤原西蒙 Who對Who對Who？（一場大屠殺的景象）

馮樂山：

你可能留意到，呢幅藤原西蒙嘅作品同呢間房另外一幅畢加索嘅畫十分相似。呢幅畫係為咗今次展覽而委約藤原創作，回應畢加索喺1951年完成嘅《朝鮮大屠殺》。喺畫入面，你會見到藤原虛構嘅卡通熊 Who the Bær。佢生活喺影像世界裏面，有無法滿足嘅慾望，想去吸收並且成為古今流行嘅圖像。

畢加索對Who the Bær嚟講一啲都唔陌生。佢多次參照呢位藝術家嘅作品。藤原想像隻熊會回應話：「當你提到藝術家，就會諗起畢加索。 」

仔細睇下藤原呢個大啲、生動啲嘅版本，你會發現其他參考咗畢加索作品嘅地方：一個哭泣嘅女人、一隻好似畢加索創作嘅和平鴿、同埋舉起緊《格爾尼卡》畫作嘅熊。藤原喺畢加索嘅經典作品裏面汲取元素，改編套用落現代。手提電話同無人機呢啲細節，唔單止暗示緊我哋身處嘅時代，亦都提醒緊我哋有份使用呢啲工具去生產同接收影像，塑造媒體嘅型態。

呢件作品評論緊圖像點傳播流通、被賦予意義同埋演變，佢邀請我哋重新反思我哋同媒體之間嘅關係。

旁述：

作品名稱《Who對Who對Who？（一場大屠殺的景象）》係藤原西蒙喺 2024年創作嘅繪畫，屬於塑膠彩、炭筆同粉彩布本作品，高220厘米，長400厘米，大約有四道門並排咁大。

作品名稱中嘅「Who」，係指藤原西蒙創作嘅卡通熊，佢個名叫做Who the Bær。呢件作品係為回應畢加索嘅《朝鮮大屠殺》而創作，喺作品入面，呢隻卡通熊就扮演咗畫入面嘅每一個角色。作品畫面呈現嘅景象同畢加索嘅原作非常相似，同樣描繪喺野外，左右各有一組人物。但同畢加索嗰幅唔同，藤原西蒙嘅作品色彩豐富，全部人物都係彩色，同埋有Who the Bær尖鼻同大耳朵嘅特徵。

左邊嘅一組人物，係四個裸體女人、兩個小孩同一個嬰兒，佢哋面容扭曲，伸出長脷，睇落好似好不滿或者憤怒。而右邊係六、七個混集喺一齊嘅人形怪物，佢哋全部伸長紅色嘅脷，噴住黃色嘅口水，手中攞住粉紅色鈍劍或者智能電話，指向左邊嘅婦孺。所有人物嘅高度差不多，大概係畫嘅高度嘅三分之二咁高。兩組人物之間嘅上空有一架航拍機，好似喺度影緊雙方對峙嘅情況咁。左邊婦孺嘅後方，係綠油油嘅遠山，山上有一座建築物，建築物頂部嘅形狀好似熊仔嘅頭咁。右邊人形怪物嘅背景就係一片黃色色調。

畫面左邊，四個半裸或全裸嘅女人擠埋一齊，當中有兩位大住個肚，似係孕婦。最左邊嘅一位個肚好大，着住藍色衫，衫上有伸長條脷嘅白鴿圖案；呢位孕婦佢一隻手抓額頭，皺眉抬頭望天；另一隻手護住一個趌高腳、伏喺自己身邊嘅小孩。佢隔籬有另一名婦人，佢面容扭曲，眼睛向下垂；佢一手拎住嬰兒，一手拎住黑色智能電話。佢右邊嘅孕婦塊臉係青色，反起對眼，佢條長脷伸向下，個肚就畀另一條脷纏住；佢手臂伸向右邊嘅人形怪物，向佢哋展示一幅同畢加索畫嘅《格爾尼卡》好似嘅黑色圖像，圖中好多怪物，有啲有牛角、有啲有馬鼻或者尖鼻，全部怪物都有大耳朵。喺呢個青面孕婦嘅臂彎中，有一位短髮女子，佢紫色嘅面上有一隻打上交叉嘅眼；佢用手指住嗰幅黑白圖像。有一個小孩一手攬住短髮女子嘅大髀，另一手抱住一隻啡色嘅尖鼻熊公仔。全部女人嘅長脷，都滴住一滴滴黃色嘅口水。女人之間，有一隻手高舉一支紅玫瑰，指向右邊嘅人形怪物。

喺畫面右邊，嗰啲人形怪物似乎正喺度大踏步向左邊嘅婦孺前進。佢哋外形線條硬朗，軀幹呈灰藍色或者紫綠色。有啲怪物似戴住圓形頭盔，有啲似戴咗面罩，有啲拎住智能電話。喺後方嘅一隻紫藍色面嘅怪物，手中揮動滴住血嘅旗，而下方有一隻怪物，佢個頭上下反轉，頭蓋打開，笑住向上方伸出雙手。喺呢啲怪物之間，一隻手高舉一個啞鈴，啞鈴上有一條尖刺，指向左邊嘅婦孺。