巴勃羅・畢加索 坐在扶手椅的女子

伍曉銓：

畢加索經常從身邊人獲取靈感，尤其係佢嘅情人。根據呢幅作品嘅創作年份，我哋知道畫中人係畢加索當時嘅伴侶弗朗索瓦絲．吉洛。兩人喺1943年認識，嗰時吉洛21歲，畢加索61歲。

喺呢幅肖像畫，我哋透過畢加索嘅視角觀察吉洛。佢嘅身軀同張凳融為一體，好似畀扶手環抱住，或者畀佢困住咁。

吉洛同畢加索喺現實中嘅關係痛苦得多。畢加索粗暴對待吉洛，多次對佢不忠。1953年，堅強獨立嘅吉洛結束咗呢段充滿起伏嘅關係。佢係唯一主動離開畢加索嘅女性。分手之後，吉洛畀法國藝術圈孤立，畢加索仲公開貶低佢。雖然係咁，吉洛喺美國重建咗自己嘅生活同事業，成為一位成功嘅藝術家。喺1964年，佢出版回憶錄《與畢加索的生活》，詳述佢同畢加索嘅關係，轟動一時。

吉洛喺2023年離世，享年101歲。

旁述：

呢件作品嘅名稱係《坐在扶手椅的女子》，係巴勃羅．畢加索喺1946年創作嘅油畫，高約130厘米，長約97厘米。

作品由幾何形狀構成，描繪黑暗嘅房間內，有一位好似戴住倒錐形面具嘅女士，坐喺一張有扶手同靠背嘅凳上。女士身後有一個長方形，似係一扇窗。畫面佈滿油上顏色嘅幾何色塊，當中仲留有筆刷塗抹嘅痕跡。

女士幾乎佔據整個畫面，佢有一頭濃密、及肩嘅紅色曲髮，佢嘅膊頭橫、腰肢纖細，身材豐滿。仔細咁睇，喺佢個倒錐形深色面具上面、接近頂部三分之一嘅位置，隱藏住一塊灰黑色嘅小圓面，上面用簡單嘅線條畫出眼睛、鼻同嘴，而面具其餘部分就刻有三角形同窄長橢圓形嘅圖案。面具兩旁各有一個藍色圓形，同小圓面差唔多大小，似係女士嘅膊頭。而面具下方有兩個大圓球，似係女士嘅胸部。大圓球約有小圓面兩倍咁大，左邊嗰個係米色，而右邊係藍色，顏色上得唔均勻，而且有幼細嘅筆觸。大圓球下方有黑色嘅陰影，凸顯球體嘅立體感。雙乳之間，向下延伸出一條藍色同黑色嘅幼柱，似係女士嘅纖腰。腰部逐漸擴闊成三角形，同樣一邊藍一邊黑。呢啲藍色同黑色似乎顯示女士着住嗰條連身裙嘅顏色，受光嘅左面係藍色，背光嘅右面係黑色。裙襬下係一對合埋嘅紫色腳。女士嘅手都係紫色，一隻晾喺凳嘅扶手，另一隻就放喺凳邊。凳嘅框架同扶手係青綠色，而靠背同坐墊係灰黑色。

女士身後、左邊同腳下，係灰黑色嘅牆同地板。畫嘅左上方有一個米色長方形，似係黑暗房間後方嘅一扇窗。而右邊牆身同地板左下方，都呈現明亮嘅黃色，睇起上嚟，就好似陽光由左邊嗰扇窗進入陰暗嘅房間，照亮窗前嘅地板同右邊嘅牆身。