林飛龍 女子與鳥

伍曉銓：

《女子與鳥》係林飛龍嘅畫作。佢喺古巴出世，爸爸係廣東人，媽媽係有西班牙血統嘅非洲裔古巴人。林飛龍喺二十一歲嘅時候去歐洲學藝術，喺嗰度認識咗畢加索，兩個人一拍即合。林飛龍呢種西方以外嘅文化背景，同畢加索截然不同，令佢大開眼界。當時，畢加索搵緊打破藝術傳統嘅新方法，而林飛龍獨特嘅風格吸引咗佢。兩個人好快就建立咗深厚嘅友誼，成為終生好友。

林飛龍同畢加索志同道合，對半人獸有共同嘅興趣。畢加索受到希臘神話啟發，經常將自己形容為牛頭怪，即係有男人身體同公牛頭部嘅怪物。而林飛龍就喺自身文化傳統裏面搵靈感，尤其係非裔加勒比人嘅宗教「聖得利亞」承傳落嚟嘅混種生物形象。喺呢幅畫入面嘅女人有一個好似馬嘅頭。作品捕捉咗聖得利亞儀式進行緊神靈附身祭司嘅重要一刻。

旁述：

呢件作品嘅名稱係《女子與鳥》，係林飛龍喺 1949年創作嘅油畫，高127厘米，長111厘米。

作品以帶灰色調嘅淺藍色同透白嘅淺黃色為主色調，用流暢嘅弧線同直線，描繪一位祼體長髮女子喺到欣賞緊一隻雀嘅優雅形態。女子面容簡約，似一塊無眼睛嘅馬面，佢頭戴住有一條條飾帶嘅頭飾，側身而坐，大髀好似鋪咗塊白布咁，冚住對腳，左手托住一隻白色雀仔。

呢位裸體女子由頭到大髀都係灰藍色，同背景色調相似，就好似係一層淺灰藍色嘅皮膚。佢乳房堅挺，向下垂嘅肩膊線同呈S型嘅腰線流暢利落，顯得身材玲瓏浮突。佢嘅面容無明顯嘅五官，只有簡單嘅線條勾勒鼻樑、嘴唇、下巴，同一執長鬚。修長嘅鼻樑令面孔睇落似馬嘅面容。女子兩邊面頰同頭頂有條狀花紋，睇落似係頭飾嘅飄絮飾帶，飾帶有啲長而尖，有啲幼而捲曲。女子有一把長過腰嘅黑色秀髮，好輕盈咁搭喺佢背後嘅長方形椅背度。佢舉起左手，手踭晾喺大髀度，掌心向天手指攤開咁托住一隻白色雀仔。雀仔頭頂有兩執捲曲嘅羽毛，面上只有一雙圓碌碌嘅眼睛，而佢白色嘅翼呈利落嘅三角形，雙雙垂喺身旁，形態同女子柔軟咁垂喺椅背嘅長髮互相呼應。

畫嘅右下角，有畫家嘅署名同創作年份。