何雲昌 《摔跤：1 和100》

旁述：

呢啲相記錄咗何雲昌喺1990年代一場標誌性嘅行為展演。何雲昌嚟自中國西南方嘅雲南，其他人或者對呢個省份有咩藝術家唔太了解。何雲昌嘅藝術生涯之中，用自己嘅身體作為藝術媒介。M+希克資深策展人皮力解釋俾我哋聽，點解呢一點令何雲昌成為一位極具革命性嘅藝術家。

皮力：

何雲昌喺1990年代嘅中國被視為一個好重要嘅藝術家，嗰陣好多藝術家都不約而同地嘗試緊點樣去延伸同擴大藝術媒介。何雲昌係其中一個藝術家，佢用身體作為一個特殊嘅媒介，去介入社會裏面。對佢嚟講，咁樣用自己嘅身體並唔係為咗好玩，而係用佢嚟測試呢個社會嘅唔同面向，呢個就係點解何雲昌相比佢之前嘅行為藝術家，有佢非常獨特嘅一面。

旁述：

喺呢個作品入面，何雲昌俾錢請咗一百個移民工同佢摔跤，仲要所有人全力以赴咁做。我哋問過皮力，呢個作品最令佢震撼嘅地方係咩嘢。

皮力：

數量喺呢個作品嘅概念入面好重要。《1 和100》呢個標題，其中包含咗藝術家點解揀一百呢個數字。唔係一同十，或者一同二十，呢度更多係為咗突出個人同社會嘅關係。一百呢個好完整嘅數字，一個好大嘅數值，似乎代表咗一個高度組織嘅社會。而一，就係一個獨特嘅個體，可能係藝術家本人，亦都可能係任何一個人。所以呢個作品《1 和100》好似象徵咗一個人同社會、個體同群體之間嘅一場好持久嘅戰爭，有時你會贏，有時你會輸。

旁述：

作為一個無經驗嘅摔跤手，何雲昌用咗三個月嚟療傷。對皮力嚟講，呢個行為藝術背後嘅訊息比個行為本身更加重要。

皮力：

呢個作品唔單只同個身體有關，而係更多關乎精神層面上嘅野，譬如話：喺最差、最孤單嘅情況之下，你嘅意志可以將你帶到去邊。呢個就係作品有意思、最耐人尋味嘅地方，從呢個角度睇，呢個係藝術家何雲昌同二十世紀末一個非常特殊嘅中國社會環境之間嘅一次對話。

旁述：

呢件作品嘅名稱係《摔跤︰1和100》，係何雲昌喺2001年拍攝嘅行為展演照片紀錄，照片喺2004年印刷。整件作品高125.8厘米，長742.8厘米。


一百張偏啡色調嘅單色照片打橫排成五列，打直排成二十行。全部相都係橫度，以中景拍攝藝術家本人同其他人比賽摔跤嘅過程，清楚展示人物全身同周圍環境。照片中嘅比賽場地係大空地嘅一角沙地，被低矮嘅建築物圍繞。沙地旁邊有一排長長嘅石級，有人坐喺石級上或者企喺附近旁觀，當中有人拎住相機同攝錄機拍攝，亦有超過四十個男人喺沙地後方一個跟一個排成一行，似係排緊隊等住上場。全部人都注視藝術家同參賽者喺沙地上進行嘅一對一摔跤比賽。


相中嘅藝術家中等身形，光頭，赤裸上身，下身着深色牛仔褲同皮鞋。比賽對手嘅身形同衣着同藝術家差唔多，但有着上身衫。全部相都係拍攝藝術家喺沙地上同唔同對手摔跤嘅情況，而藝術家多數處於下風。以其中五張相為例：


第一張相，對手半躺喺地上，藝術家喺旁邊單膝跪地，側身壓住對方上身，雙臂環扣對手條頸，見到藝術家嘅手瓜起腱。


第二張相，藝術家背向對手，右腳屈曲沉腰，左手拗向後，穿過對手嘅胳肋底，再撳住佢條頸。對方一隻腳凌空，似乎就快被藝術家過背躂落地。


第三張相，藝術家坐喺地下，對手迎面倒頭舂落佢大脾，一隻腳踢起地上嘅泥沙。藝術家頸上青筋暴現，似乎用力緊緊箍住對方胳肋底。

第四張相，對手曲膝，身體向後沉，一手攬住藝術家上半身，一手抱起佢嘅右腳，令佢成個人凌空，好似下一刻對手就會將藝術家躂落地。


第五張相，藝術家似乎啱啱躂咗落地，佢背脊貼地瞓咗喺度，手按地面，雙腳撐喺半空，面容扭曲，狀甚痛苦。佢腳上嘅皮鞋無咗，相中亦唔見比賽對手。