M+希克藏品（捐贈），香港，© 楊心廣，圖片：M+，香港
旁述：
呢件作品嘅名稱係《絜矩》，係楊心廣喺2007年創作嘅裝置作品，物料為圓石。
喺一個長4米、闊3米嘅展示空間，作品分成兩組喺地上展示。一組係方形石堆，另一組係圓形石堆；一組設置喺另一組嘅旁邊，觀眾可以喺四面欣賞作品。
石堆中嘅石塊分別呈粉紅色、灰色或者淺啡紅色，表面光滑帶石紋。方形石堆當中嘅石塊係一舊舊被切割成唔同大細嘅磚頭，放喺地面邊貼邊密鋪成一個正方形平面；而圓形石堆嘅石塊係形態不一嘅碎塊，堆成一個圓拱形小丘。
排成正方形嘅一組，磚頭有大有細，大嘅約有成人成隻手掌咁長，細嘅就約有成人半隻手掌咁長。磚頭嘅形狀有長方體，亦都有正方體，有部分缺角或者尖角被磨平。磚頭高度不一，一舊貼住一舊整齊排列，並無重疊。睇起嚟，高高低低嘅磚頭似係喺圍城中逼埋一齊嘅建築物。
另一組堆成圓形嘅石堆，石塊同樣有大有細，但形態各異，形狀不規則，表面參差不齊，一塊疊喺另一塊嘅上面，似係隨意咁堆疊由大石切割落嚟嘅碎石，佢哋同排列整齊嘅正方形石堆形成強烈對比。