M+希克藏品（捐贈），香港，© 趙半狄，攝影：鄭樂天。圖片由M+提供
旁述：
趙半狄喺1999年創作咗一系列題為《趙半狄和熊貓咪》嘅海報。喺2025年開幕嘅「M+希克藏品：心靈圖景」展覽中，展出咗其中四張海報。海報係彩色嘅覆膜噴墨印相，高約116至127厘米不等，長約120厘米，接近係正方形。
全部海報都以藝術家本人同熊貓公仔為主角，配以對話框，文字內容中英對照。趙半狄運用公益廣告中常見嘅視覺語言，並且將熊貓呢種既係中國國寶、又具有外交意義，同時形象親和可愛嘅動物，作為敘事載體。趙半狄透過同熊貓對話，探討當時中國社會關注嘅議題，包括毒品、冒牌貨品、失業同愛滋病。
其中一幅海報嘅名稱係《趙半狄和熊貓咪──我下崗了。送你一個禮物，它能讓你看的遠些》，描繪藝術家同熊貓日光日白喺天橋上對話嘅場景。藝術家企喺畫面右邊，身穿一件以黃色做主色嘅連帽風褸，並且用風褸附帶嘅藍色帽笠住自己個頭。佢背向我哋，微微向前彎腰，挨住欄杆，好似望住橋下車水馬龍嘅景象。佢同熊貓講：「我下崗了。」——「下崗」係中國特有嘅名詞，意思係「被解僱」。對話框帶有尖角，代表藝術家語帶激動。而熊貓出現喺畫面左邊，佢坐喺欄杆，面向藝術家。熊貓同藝術家之間嘅欄杆上，擺放咗一個望遠鏡，而熊貓就拎住望遠鏡嘅頸繩。熊貓回答：「送你一個禮物，它能讓你看的遠些。」對話框呈弧形，襯托出熊貓嘅柔聲細語。海報嘅構圖層次分明，近景天橋上嘅人物清晰可見，中景嘅馬路模糊不清，遠景嘅天色灰濛濛一片。呢種視覺上嘅安排，正正呼應對話內容中「被解僱後前路茫茫」嘅迷惘，同埋「用望遠鏡睇清前路」嘅盼望。