中庭

旁述：

你依家身處M+嘅二樓，喺博物館倒T字型結構嘅底部。雖然你仍然可以喺呢層嘅中通位置，望到地下大堂同潛空間，但當你畀唔同嘅展覽廳包圍住，就可以感受到佢橫向嘅佈局。我哋刻意將29個展覽空間匯集喺同一樓層，方便訪客唔駛上上落落都可以參觀唔同展廳。

二樓嘅中心位置係中庭，呢度有一座好有動感嘅旋轉樓梯，兩側係之前介紹過嘅採光井。開揚嘅結構，令陽光照遍呢個空間，就算中庭有啲由混凝土巨柱交叉組成嘅「桁架」，仍然營造到開放同明亮嘅感覺。如果你想知道多啲建築團隊點樣用呢種結構撐起整座M+大樓，請你喺語音導賞目錄中選擇「焦點──巨型桁架」。

呢一層嘅佈局有少少似羅馬古城：通常城市中心會有一個公民廣場，開放畀所有公眾使用。公民廣場上有兩條大街交匯，一條由北至南，一條由東至西，將整個城市自然地劃分做四個社區。每一個社區都有佢自己嘅特徵、地標同埋氛圍。喺M+呢度都一樣。你會見到我哋嘅展廳分為四個獨特嘅區域，由中庭望出去，分別係南展廳、西展廳、東展廳同埋北展廳，又名希克展廳。

假如有機會，你可以慢慢探索吓呢啲展廳，同展品互動之餘，亦都可以感受唔同嘅展廳點樣運用獨特嘅佈局同材料，凸顯各自嘅風格。