M+大樓的巨型桁架。攝影：梁譽聰。M+，香港
旁述：
你一定留意到二樓旋轉樓梯兩旁有四組傾斜嘅巨型支柱，每兩條支柱為一組，V字型咁由地下支撐住天花，佢哋就係M+嘅巨型桁架。如果你頭先已經探索過地下各樓層，你應該見過呢啲桁架嘅底部，就係嗰啲畀混凝土板塊覆蓋住嘅巨柱。
你可能記得我哋喺潛空間提及過，嗰兩條貫穿M+地基嘅鐵路隧道，對於建築團隊嚟講係一個靈感，亦係一個挑戰，因為隧道上方絕對唔可以承受任何重量，所以要設計一個巧妙嘅地基結構，令整座大樓好似條天橋咁架空喺隧道上面。
為咗將大樓嘅重量分佈喺地基上，確保機場快綫同東涌綫隧道唔會受壓，建築團隊用咗五個高強度巨型桁架組成一個大型結構。香港係首次喺建築物上採用呢種巨型桁架，亦因為咁，團隊想喺二樓呢度展示呢種獨特嘅建築結構，喺整座博物館之中創造一種活力充沛、意想不到嘅空間體驗。