中庭焦點——西面的落地玻璃窗

旁述：

二樓中庭附近有一排面向西面嘅落地玻璃窗，同其他展廳嘅窗口好唔同，嗰度可以畀你飽覽外面嘅風景。當你面向升降機，佢嘅左面有一條走廊，天花到牆身都用咗竹嘅材質，沿走廊行到盡頭就係啦。如果有需要，你可以暫停呢個錄音慢慢行過去。

呢個由地下、牆身到天花都以竹為材料嘅空間真係非常吸引。呢個大膽嘅設計方案，突破附近傳統展廳嘅常規，含蓄咁體現M+係一間亞洲嘅視覺文化博物館。呢種設計風格同隔離嘅合院展廳互相呼應，營造同一般以白牆為主嘅展廳截然不同嘅觀賞經驗。多元嘅環境佈局，強調唔同文化有唔同方式欣賞藝術：就好似水墨字畫同卷軸畫通常都係作私人收藏，每次拎出嚟只可以畀幾個人欣賞，屬於一種比較私密嘅觀賞體驗。

當你行到色調溫暖、竹製嘅走廊盡頭，嚟到窗邊，即係你已經到達M+其中一個最具人氣、最多人留影嘅地方嘞！呢度嘅落地玻璃由一行行打直嘅竹板分隔，同外面嘅陶瓦對齊，望出去就係博物館西面嘅藝術公園。

呢塊落地玻璃睇起嚟好似平平無奇，其實係經過深思熟慮嘅選擇。因為團隊唔想影響建築物內外嘅景致，所以比起遮光玻璃，佢地揀咗透光玻璃嚟做窗口。佢哋唔想海旁嘅M+大樓望落去硬繃繃、變成阻礙景觀嘅龐然大物。相反，佢哋希望呢度係一個開揚嘅空間，咁先反映到博物館多元、開放嘅收藏。

但唔用遮光玻璃，香港猛烈嘅陽光就會直接曬入嚟，將紫外線帶入博物館。不過，你再仔細望出窗外，就會發現由釉面陶瓦嵌板組成嘅外牆設計，原來有遮蔭同減少紫外線進入大樓嘅功用。如果你仲未聽過我哋講解呢啲M+獨有嘅陶瓦，你可以喺目錄選擇「焦點──釉面陶瓦」，深入了解一下。