M+大樓。©麥憬淮。攝影：麥憬淮。 圖片由Herzog & de Meuron提供
旁述：
M+大樓主要由三部分組成，由上而下包括一棟高樓、 一個平台以及一個基座，三部分相連。從東面或西面望，高樓同平台嘅外觀好似一個上下倒轉嘅立體英文大楷「T」字。開放畀訪客參觀嘅主要展覽空間，設於平台同基座嘅樓層。M＋大樓共有16層，另外設有兩層地庫。
高樓高約66米，長110米，闊約10米，面向維多利亞港嗰面外牆，裝滿一行行LED燈，當着咗燈，就會成為一個同外牆一樣咁大嘅巨型螢幕。高樓下方嘅平台係一個長方體，高約12米，長110米，闊約130米，樓層面積約有兩個足球場咁大。高樓同平台嘅外牆，鋪咗波浪形以及圓筒狀嘅墨綠色陶製瓦片。而平台下方嘅基座，整體比平台細，平台於是成為基座上方一道寬闊嘅簷篷，用嚟遮蔭擋雨。基座嘅外牆大致上係灰色混凝土牆，同高樓以及平台嘅墨綠色瓦片形成強烈對比。
基座包括兩層地庫同地面層，地面層四面各有一個入口。部分入口處外裝有一盞盞半透明圓形吊燈，燈罩嘅直徑超過一米，外形好似一隻隻反轉嘅巨型湯碗，又圓又厚，係仿照街巿常見嘅燈罩外形製造。基座外圍嘅牆身係灰色混凝土牆，到近入口處就開始轉為一節節墨綠色仿青竹嘅圓筒形陶製瓦片，呢啲瓦片鋪砌成一片茂密嘅竹林，由室外延伸到室內空間。
由地面層入口進入室內嘅地下大堂，樓底高過7米，地面鋪上灰色混凝土地磚，表面帶有木紋。高身灰色混凝土柱分佈喺大堂唔同位置，部分柱身好似地磚咁有木紋。大堂四面裝有落地玻璃，地面有兩個開口，可以望到地庫；天花板亦有兩個開口，可以望到平台嘅天窗，自然光會從呢兩道天窗透射到地下大堂，同埋兩層地庫。最底嗰層地庫又叫做「潛空間」。如果行近大堂地面開口嘅圍欄俯視，可以見到兩級巨型樓梯級橫越潛空間。梯級由混凝土建成，每級都高過一個成年人嘅身高。呢兩級梯級覆蓋住嘅，係港鐵東涌綫同機場快綫嘅行車隧道。
由地下大堂上一層，就會進入平台嘅部分，到達二樓展廳。呢層嘅天花板有一排排光管。而同大堂唔同嘅係，地面鋪上淺啡色木地板，配襯白色牆身，並且有九對深啡色大門，可以通往展區。而部分大門旁邊嘅牆身，有鮮色嘅展覽圖像。喺呢層嘅中央位置，有一個寬闊方正嘅中庭，周邊係唔同嘅展區同埋名為「大台階」嘅活動空間。中庭正中間，有一條白色螺旋形樓梯，向上連接三樓。螺旋形樓梯嘅左右兩邊，各有一列四條灰色混凝土柱。兩列柱平行相對，望向其中一列，會見到四條柱一字排開，兩條為一組，分別斜向左同右。呢啲傾斜嘅支柱係建築結構巨型桁架嘅一部分，用嚟支撐成座大樓。中庭同周邊展區之間，左右兩邊嘅地面各有一個開口，天花板各有一道玻璃天窗。無論喺地庫「潛空間」、地下大堂定係二樓展廳向上望，望到嘅都係同一道天窗。