PHUNK 《混亂秩序》

陳俊達：

我認為《混亂秩序》 好大程度上係PHUNK開創先河嘅作品，因為佢啟發咗我哋作為藝術家要行嘅路，佢就好似係我哋嘅宇宙同埋故事嘅起源。

旁述：

陳俊達，係新加坡藝術及設計團體PHUNK嘅四名成員之一。呢件充滿活力嘅錄像裝置，係佢哋之前一件作品嘅動態版，係嚟自2003年一個關於街頭藝術嘅展覽入面，一件喺坑紋紙板上嘅絲印作品。呢個作品嘅標題係《混亂秩序》，反映咗PHUNK點樣睇佢哋自己嘅創作過程同埋當時世界嘅狀況。

呢個作品嘅背後有好多啟發。從中國神話到香港嘅武俠片，由亞洲各地嘅城市景觀，以至街頭藝術次文化，陳俊達同我哋分享更多細節。

陳俊達：

我哋好鍾意中國哲學裏面「陰陽」嘅概念。我哋深信兩樣嘢都係必須嘅，所以有破壞先有創造。但我哋認為兩者之間可能有一個好有趣嘅平衡，而又成日不斷掙扎，試圖去打倒對方。如果你用新加坡嘅視角去睇，係好有意思嘅。你知啦，尤其係喺[19]90年代，新加坡係某種程度上仍然係一個所謂「秩序受控」嘅國家。

另一件真正影響到我哋嘅事，就係睇返當時嘅香港，有好多設計師同插畫師都由單純地做設計，轉移去做街頭藝術同美術。

嗰陣有一個過渡期，好多人唔再只係向西方尋找靈感，當時好多嘅創作，實際上都係喺啟發自東方文化。我哋可以睇到東方嘅神話、民間傳說、童話、仲有道德價值係點樣反映喺當代嘅環境之中。

旁述：

不論係之前嘅絲網印刷版本，定係我哋依家面前睇緊《混亂秩序》呢個動態作品，裏面啲靈感同主題，其實一直蘊釀喺PHUNK嘅創作過程裏面。

陳俊達：

我覺得《混亂秩序》一路都係佔我哋嘅靈魂裏面好大部分。所以，當我哋做其他作品嘅時候，我哋只係擴充當中嘅世界同宇宙觀。

旁述：

呢件作品嘅名稱係《混亂秩序》，係一段一分鐘嘅單頻道無聲彩色數碼動畫，由新加坡藝術及設計團體PHUNK創作，喺2020年製成。2021年開幕嘅「物件・空間・互動」展覽中，就節錄咗其中30秒嚟展示。

畫面有密密麻麻嘅圖像，大致分成上、中、下三個部分，分別為天堂、人間同地獄三個世界。三界都有黑白分明嘅卡通圖像，線條簡單，但人物同景物混雜。而三界嘅背景都係寶藍色同紅色斜線條紋，一隻色跟住另一隻色不斷向右上角移動，好似髮型屋嘅旋轉燈咁。

天堂佈滿黑雲，雲中有幾圈白色嘅螺旋線條，似中國傳統雲紋紋飾。黑雲之間，有寫住「南帝」嘅牌坊、類似北京天壇祈年殿嘅圓筒形尖頂建築，同埋中國傳統塔樓。呢啲建築物懸浮喺空中，佢哋之間夾雜穿着新潮服飾嘅神祇，例如：最右邊有位大肚腩笑臉彌勒佛，頭戴骷髏骨圖案嘅鴨嘴帽，盤起雙腿，腿上放咗一個空嘅珍珠奶茶杯；彌勒佛旁邊有隻雷公鳥，雙腳站立，一手握住閃電，一手拎住雷公大錘，着住寬鬆嘅T恤同人字拖；而喺天界中央，有一隻巨型白色斑點狗，前腳踩住黑雲，後腿微微遞高，胯下嘅陰莖流出一滴黑色汁液；而天界最左邊有一個馬頭女人身嘅像，佢跪低雙手撐地，下身赤裸，一隻頭戴金剛箍嘅馬騮，同樣下身赤祼，跪喺馬頭女人身嘅後面，緊貼住佢嘅臀部，似係後進式嘅性愛體位；另外，仲有留鬚梳髻嘅道士騎大象，光頭羅漢騎住鹿頭女身，道士同羅漢都赤身裸體。部分建築物同人物嘅特徵或者形象，隱含香港功夫片，以及新加坡主題公園虎豹別墅嘅元素。

喺天堂嘅黑雲下面，係人間。背景係密集嘅高樓大廈，當中就好似混集咗世界各地著名城市嘅地標，有啲大樓嘅外形好似香港嘅中銀大廈、紐約嘅帝國大廈、東京鐵塔等等。喺呢啲大廈之間有一隻巨型魷魚，伸出十條長長嘅觸鬚。喺魷魚嘅前面，有兩班人喺左右兩端遙遙相對，似係各據一方，僵持不下。左邊嘅人似一班防暴警察，佢哋戴頭盔、黑色口罩，着全黑衫褲同白色人字拖。最前排嘅三個人左手持長形盾牌，右手握一條魚；後方嘅人就操控座地大炮，有人將一條魚放喺炮筒口，炮筒上空有幾條魚，魚嘅尾部係螺旋槳。至於右邊嘅人，似一班示威者，佢哋面向左邊排成一列，着住一式一樣嘅三間條紋波鞋，着全黑服裝或者着心口印有心形圖案嘅T恤。當中有人用圍巾遮面，有人戴住哈哈笑面具，有人手上舉住哈哈笑圖案嘅示威牌。呢啲哈哈笑圖像，都係參考自美國DC漫畫《保衛奇俠》出現過嘅元素，係一張笑臉，右眼有兩滴血。

喺人間嘅底部有一團團黑色嘅火焰，連接畫面下方嘅地獄，反映中國民間傳說中，十八層地獄嘅景象。地獄嘅背景有一群魚集中喺左邊，似係由左游向右咁。最右邊有黑白無常同牛頭馬面。黑白無常後面有一班貼上封印符咒嘅鬼仔，牛頭着住印有哈哈笑圖案嘅T恤同人字拖，馬面就着住T恤、黑長褲同波鞋，牛頭馬面看守住背後嘅大鍋，個鍋正烹煮緊人類，有啲人化嘅眼妝同美國Kiss搖滾樂隊成員好相似，佢哋其實係PHUNK嘅成員。而地獄中間偏左嘅位置，一個個戴住笑臉面具嘅人全身赤裸，被鐵鏈綁喺一條條柱上面，佢哋被一班容貌身形都差唔多嘅鬼仔用刀劏肚或者抽出腸臟，有人劏肚嘅位置被縫合，亦有縫合嘅傷口爆開，流出內臟。最左邊有四條較粗嘅柱，柱上同樣用鐵鏈綁住戴住笑臉面具、全身赤裸嘅人，亦有幾隻已經劏好同掹晒羽毛嘅雞，柱底有燃燒緊嘅火爐，有小鬼正喺度加柴。另外，仲有三隻單眼仔疊羅漢一個撐起一個，似由地獄爬上人間。最頂一隻拎住一把火把，點燃住黑色火焰，似係押送死者入地獄。

畫面色調持續係黑、白、藍、紅，色彩對比強烈。而動畫中唔同部分嘅圖像會不斷重複動作或搖擺。