Archigram、彼得·古克 「插接城市」

羅發禮：

我叫做羅發禮，我係一個喺香港出世嘅建築師，讀書嗰陣曾經跟過Peter Cook，佢係Archigram嘅成員之一。我讀大學嘅時候見識過Archigram嘅工作，因此對整個建築專業非常樂觀。佢哋真係開放咗詮釋建築嘅靈活性同創造力。

旁述：

作為一名建築師，羅發禮以一種非常特殊嘅方式去睇呢個世界。佢話俾我哋知，香港係一個設計非常精密嘅現代城市，有互相連接嘅摩天大廈、鐵路、甚至係浮喺島嶼上嘅機場。而喺所有呢啲嘢成為現實之前，已經有人預視呢一切將會發生。

羅發禮：

有一班名為Archigram嘅建築師，佢哋喺1960年代已經思考緊好似香港咁複雜咁不可思議嘅城市係點樣。雖然今日我哋認為係理所當然嘅一切喺嗰陣時仲未起好，但Archigram提出嘅呢個願景，係非常大膽。佢哋認為城市係可以用唔同嘅方式去營造同埋設計。

旁述：

Archigram喺設計城市方面最重要嘅嘗試之一，就係「插接城市」。羅發禮為大家更仔細介紹呢個作品。

羅發禮：

今日大部分嘅城市，仍然係用傳統由地面開始建造嘅方法；但「插接城市」好大程度上係反地心吸力。亦即係話，建築物係可以從上而下咁起出嚟，單係呢一點已經好有趣，因為無論喺軟件定係硬件嘅世界裏面，我哋真係見到我哋嘅城市設計好過時，因為要提升一個城市並唔容易，亦唔能夠好輕易將一個城市改頭換面。但「插接城市」話俾我哋知未來有一點係好重要，就係靈活性。呢個係創造一個全新可持續發展城市嘅核心價值。

當我哋理解咗Archigram嘅背景，再睇吓香港，我哋就應該要俾啲創意咁問吓自己：「香港可以點？」。如果將香港睇成係一塊空白嘅畫布，佢可以立刻變成一個樂觀嘅地方、一個充滿機遇嘅城市。而呢個正正就係Archigram嘅精神所在。

旁述：

「插接城市」係一個概念城市，由建築團體Archigram成員彼德．古克喺1964年構想出嚟。根據佢嘅理論，呢個城市係一個自給自足嘅巨型建築網絡，構建物可以按需要增加或移除，並以管道同埋吊臂輸送物品。喺2021年開幕嘅「物件・空間・互動」展覽，就展出咗同呢個概念相關嘅立面圖、軸測圖、位置圖、錄像、模型、建築雜誌等。

其中一幅立面圖高52.5厘米、長111厘米，係「插接城巿最大壓力區」立面圖，圖中以唔同顏色同埋形狀，標示區內嘅建築物、連接路徑以及區域使用用途等等。區內嘅組件同構建物，由左至右、由下而上、由前景到後景分布全圖，構建物同區域之間有路徑同管道互相連接，睇起嚟好似一組龐大嘅機器結構。

立面圖為橫度長方形，四隻角裁切成圓角。全幅圖主要用上紅、藍、綠、橙紅、紫紅同黃色，形狀包括唔同粗幼嘅條狀、唔同大細嘅圓形、電芯形狀以及不規則多邊形等等。

圖中嘅地面為藍色，有兩個工整嘅梯形大凹槽。一條條綠色管道交疊成一格格菱形網，左右貫通全圖。網狀管道左右兩邊各有一組垂直管道，好似兩道巨型門框，嵌落地面凹槽。而喺網狀管道頂部，就有一組淡灰色、好似巨型機械臂嘅裝置，扣連左右兩組門框管道。一組組藍色橫條狀嘅結構夾雜喺管道後方嘅建築物之間，就好似一條條有長有短嘅運輸帶。

喺立面圖最左邊，垂直有三串電芯形狀嘅黃色建築物，標註為「APARTMENT（公寓）」，差唔多有成幅立面圖咁高，電芯之間有藍色組件連接；而呢啲藍色組件，就接駁住網狀管道同運輸帶。公寓右邊係一棟紅色嘅棒狀物，有公寓嘅一半高度，標註為「CAR SILOS」，係停泊汽車嘅圓柱塔。之後係一組好似電力供應或者滑動運輸嘅系統，標註為「A FEEDS（A供應裝置）」，由一組滑輪狀結構連接住左邊嘅門框管道，標註為「ROUTE A（路徑A）」。經過門框管道向右，係用一個個橙紅色長方形疊高成棒狀或者斜擺成梯級狀嘅建築，標註為「OFFICES（辦公室）」同「INFORMATION SILOS（資訊塔）」，呢個區域嘅下方標註為「RAIL STOPS（鐵路站）」。再向右依次序係多邊形黃色嘅「PLAZA（廣場）」、「THEATRE（劇院）」同「EXHIBITIONS（展覽區）」。然後就係位於右邊門框管道嘅「ROUTE B（路徑B）」。喺門框管道右邊，再有棟停泊汽車嘅紅色圓柱塔，旁邊有另一棟高過佢一倍嘅紅色圓柱塔，都係用嚟泊車嘅，但呢座塔向上展開成漏斗形狀，上方有一層層膠囊狀嘅構建物，並有綠色管道貫穿。圖嘅最右邊，係「MUSIC THEATRE（音樂廳）」。以上全部都係前景建築，而後景建築主要喺圖嘅中間，以淡灰紅色顯示，其中有一棟係高聳嘅漏斗形建築物。區內有四棟建築物嘅頂部有吊臂。

立面圖整體泛黃，有破損同釘孔。右邊打直同下方打橫嘅邊沿有刻度，右邊由下而上沿邊標註英文字母D至H，同埋J，下方由左至右沿邊標註數字「X72」至「X92」。