攝影：Yusuke Miyazaki。鳴謝大田秀則畫廊、維多利亞．米羅畫廊及卓納畫廊。© 草間彌生
譚雪凝：
歡迎嚟到《草間彌生：一九四五年至今》。
呢次展覽集合咗草間彌生七十幾年嚟嘅作品。展覽圍繞六個主題：無限、積累、生物宇宙、全面連結、死亡以及生命的力量。喺整個展覽入面，你將會睇到草間彌生嘅個人經歷點樣影響佢嘅藝術創作，同埋佢係點樣喺男性主導嘅領域入面開創先河。
我係譚雪凝，M+視覺藝術副策展人。
楊柏匡：
仲有我，楊柏匡，M+教學及詮釋助理策展人。
譚雪凝：
我哋將會透過語音導賞，帶領你更仔細咁欣賞草間彌生嘅一啲重要作品。我哋將會分享對佢嘅思考過程同創作實踐嘅見解，亦會討論藝術點樣令佢治癒同帶嚟轉變。
請你掃描二維碼，或者輸入展品標籤上嘅數字嚟讀取內容。
我哋感謝今次展覽嘅首席贊助匯豐，對展覽同語音導賞嘅慷慨支持。