收聽
楊柏匡：
草間彌生喺創作某一啲《無限的網》畫作嘅時候，會將畫布平鋪喺大枱上畫畫，呢一幅就係咁畫㗎喇。有時候，佢會將比較大型嘅作品，靠喺佢紐約工作室嘅牆度，企喺長梯上面畫。
當你睇到呢幅名為《No. H. Red》嘅畫作嘅時候，可以嘗試想像草間彌生嘅手喺成個畫面上重複描畫嘅動作，亦可以想像一下，佢係點樣調整顏料嘅厚度去將紋理畫出嚟。草間彌生運用環形嘅筆觸，喺黑色嘅背景上面，創造咗一個好似喱士咁錯綜複雜嘅紅色圖案。如果你將注意力轉移到畫面嘅負空間，即係由圈狀細線形成嘅「網」入面嘅網眼，黑色背景就會慢慢浮現，望起上嚟好似一大片細小嘅點。通過呢種對立嘅關係，你可以睇到網同點係點樣互相聯繫。對草間彌生嚟講，點同網嘅彼此關係，代表咗無邊嘅宇宙，以及我哋喺入面嘅位置。
畫畫嘅過程或者會消耗好多體力，但係草間彌生可以忘我咁創作。有時候，佢會連續畫三、四日唔瞓覺。咁樣唔單只令佢失去咗對時間嘅意識，亦令佢脫離咗現實。佢曾經講過，有一日佢瞓醒，發現佢嘅「無限的網」依附喺工作室嘅窗上面。當佢伸手去觸摸呢啲網，佢哋好似爬上咗佢嘅雙手。呢啲幻覺導致佢經常住院。
草間彌生被佢自己創造嘅網籠罩住，佢嘅作品反映咗佢體驗到嘅現實。佢曾經講過：「我慢慢覺得自己墮入積累同重複嘅魔咒，深陷喺網入面；網從自身擴展，超脫畫布，覆蓋地板、書枱同所有地方，甚至成個可見嘅宇宙。」
旁述：
呢件作品嘅名稱係《No. H. Red》，係草間彌生喺1961年創作嘅油彩布本作品。圖像高157厘米，長142厘米。
離遠睇，作品好似一張綿密嘅血紅色巨網。巨網中有一個個細小網孔，網孔下透現出深色小點，啲點好密集，數量又多，成千上萬，佈滿全個畫面。部分位置嘅小點較為淺色，近似泥黃色；部分位置就較為深色，近似啡黑色。巨網睇起嚟就好似喺畫面上下起伏，又或者旋轉流動，帶有動感。
近睇作品，會見到巨網係由一圈圈紅色嘅環形線條組成。紅線互相交錯重疊，線與線之間形成網孔，網孔嘅大細同形狀不一，有啲好似米粒咁窄長、有啲好似碎片咁一塊塊。凝視作品嘅時候，網孔下透現嘅深色小點，同紅色嘅網線同樣突出。