收聽
譚雪凝：
留意草間彌生《無限的網》嘅畫作，當中冇明顯嘅中心或者焦點。草間彌生嘅《無限的網》圖案覆蓋咗成幅畫布，就好似亞洲嘅山水畫，容許我哋漫步於畫面之中，用眼睛去旅行。當你遊走喺呢片抽象嘅風景裏面，任由想像力飛馳，你可能會感覺自己被作品籠罩，體驗到一種壯嚴嘅氛圍。嗰種感覺就好似喺雲端行走，好似喺霧氣繚繞嘅森林裏面俯瞰大地，或者好似翱翔於流光溢彩嘅汪洋大海之上。
草間彌生創作生涯嘅其中一個目標，就係藉住藝術去捕捉無限嘅體驗。佢1959年喺紐約開始創作《無限的網》系列。五十到六十年代期間，呢嗰系列嘅畫作通常會用暗淡嘅色調或者三原色。相反，眼前嘅呢幅四屏畫，運用咗唔尋常嘅顏色，包括熒光色同彩虹色。草間彌生喺2011年創作呢件作品，當時日本東北地區發生地震同海嘯，之後福島又發生核洩漏嘅災難。陰森恐怖嘅顏色散佈喺畫面上面，就好似核洩漏之後嘅放射性污染，或者海上嘅石油洩漏事故。
呢幅畫嘅標題喺《輪迴》，係指從一種形態轉換到另一種形態嘅行為，呢嗰係佛教信仰裏面嘅核心概念：投胎轉世。草間彌生意識到呢場災難對日本嘅巨大影響，於是創作咗呢幅作品，將災難轉化為希望同再生嘅訊息。
旁述：
呢件作品嘅名稱係《輪迴》，係草間彌生喺2011年創作嘅塑膠彩布本作品。一組四幅打橫排嘅畫作，整體高194厘米，長約521厘米。作品以密集嘅網狀線條覆蓋四塊長方形畫布。有唔同嘅顏色分佈喺畫面上，網狀線條係海軍藍色同埋螢光綠色，一粒粒網點構成一大片螢光粉紅色。呢件掛喺牆上面嘅作品，睇起嚟就好似呈現出一片海，海面上飄浮住一浸彩色嘅油污。
作品以海軍藍色同螢光綠色畫上細密嘅網，網狀線條交織出一個個小洞。離遠睇，呢啲洞就好似密集嘅螢光粉紅色圓點；近睇，就唔再似圓點，而係一粒粒不規則形狀嘅點。每粒點大約有成人指頭咁大，而且有海軍藍色或螢光綠色圍住。
遠睇呢塊網狀物，有啲顏色喺某啲位置較為密集，呢啲顏色主要係螢光粉紅色同埋深深淺淺嘅螢光綠色，顏色睇落有強烈對比，當中部分地方混有海軍藍色，睇落較為深色。而細密嘅螢光粉紅色點有大有細，分佈喺畫作唔同地方，呢啲粉紅色點之間，顯露較多綠色嘅部分較為明亮，顯露較多藍色嘅部分就較為暗淡。有明有暗嘅色彩睇落帶有動感，似海上嘅油污，喺海面流動，泛起一抹抹異樣嘅顏色。