收聽
楊柏匡：
望住呢件裝置，你會以為草間彌生嘅《無限的網》畫作喺牆上面炸開咗，令到五顏六色嘅點同網灑滿附近每個人同每件物件上面。草間彌生喺六十年代尾創作咗《自我消融》，當時佢住喺紐約，積極參與嬉皮士嘅反主流文化。佢主持咗幾十場行為展演，喺表演者嘅裸體上面畫波點。喺你面前嘅人體模型、傢俬同其他家用物品上面，佈滿點同網，延續咗佢呢種創作手法。
如果仔細觀察，你會注意到呢啲人體模型全部都係女性，佢哋頭上戴住嘅假髮係六十年代尾流行嘅髮型。意大利粉散落一地，幾乎形成一張網，包圍住人體模型，並且凸顯咗呢個室內佈景嘅超現實特質。
呢件作品強烈而又帶啲不祥嘅標題《自我消融》，同我哋眼前五彩繽紛嘅場景，形成咗有趣嘅對比。草間彌生喺佢嘅創作生涯裏面，持續探索「消融」嘅概念。呢個概念源自消極同積極合二為一嘅理念，解釋咗佢點解一直迷戀同使用波點圖案。草間彌生講過：「波點唔能夠單獨存在……當我哋用波點將大自然同自己身體消融嘅時候，我哋就同環境融為一體 。」 喺呢件裝置作品入面，人體模型所代表嘅個體，似乎成為咗整體嘅其中一小部分。
旁述：
呢件作品嘅名稱係《自我消融》，係草間彌生喺1966至1974年期間創作嘅裝置作品，創作物料包括油上油彩嘅人體模型、枱、凳、假髮、手袋、馬克杯、碟、水壺、煙灰缸、塑膠植物同塑膠生果。作品尺寸視乎裝置空間同裝置方式而定。
作品中間係一張餐枱同四張凳，枱同凳旁邊有六個女性人體模型，佢哋企喺度，各踞唔同位置，各有姿態，有啲似喺度傾偈，有啲就似望緊遠處。枱、凳同埋所有人體模型嘅表面，全部都畫咗密集嘅網狀圖案，網嘅顏色包括紅、橙、黃、綠、青、藍、紫同埋黑色。
喺紅色嘅長方形餐枱上，放有水壺、馬克杯、碟、煙灰缸、塑膠植物同埋塑膠生果，枱上嘅物件各有唔同顏色。圍住餐枱嘅四張凳，全部都遠離餐枱少少，好似原本有人圍住餐枱坐但啱啱離開座位，所以啲凳褪開咗咁。四張凳都有高身椅背，其中一張嘅椅背掛住一個紅色手袋。凳嘅顏色分別係藍色、深綠色、紅色同綠色。
六個女性人體模型身材玲瓏浮凸，全部都戴上假髮，係六十年代末流行嘅髮型，有啲長過耳珠向外翹起，有啲係齊蔭、及腮嘅貼服短髮，有啲就似冬菇形狀。人體模型嘅腳踭下面都有高踭，好似着咗高踭鞋。佢哋嘅站姿輕鬆自然，姿態各有不同，部分微微弓起背脊，部分呈S形姿態傾向一邊；佢哋全部都有一隻腳微微曲膝，有啲併合雙腳咁企，有啲就擘開腳步企；有啲面對面企，提起手好似喺空中比劃，有啲就幾個圍埋。佢哋睇落好似參與緊社交聚會。
人體模型、枱凳，以及餐桌上面嘅物件，佢哋嘅表面都畫咗色彩鮮明嘅網狀圖案，係一筆半圈接另一筆半圈畫成嘅弧線，呢啲不斷重複嘅弧線緊密相連，好似一張網包住以上嘅物件。網之間嘅窿係白色、綠色、黃色、橙色或者藍色，每個窿都有成人嘅手指頭咁大。六個人體模型中，有四個係全身都畫咗一隻顏色嘅網，其中兩個用咗紅色，其餘兩個分別用咗橙色同綠色，睇落好似着咗一件由頭到腳、包住全身同鞋嘅緊身衫；另外一個人體模型，身體大部分係綠色嘅網，只有塊面同埋四肢係橙紅色嘅網，睇起嚟好似爬蟲類動物嘅鱗片佈滿全身；最後一個人體模型，就由面到頸，再到左肩，然後跨過胸口到右腰位置，畫咗深綠色嘅網，身體其餘部分就係黃色嘅網，好似全身披住蟒蛇嘅皮。