收聽
譚雪凝：
呢啲日常物品，包括鞋同凳，睇起嚟好似畀一堆柔軟嘅陽具形狀填充布袋侵佔咗。與此同時，彩繪嘅通心粉好似一群螞蟻咁，喺裙上面亂咁穿插。
草間彌生經常將佢嘅情結同恐懼化為創作主題。佢話：「一而再、再而三咁複製呢啲嘢，係我克服恐懼嘅方式……咁樣就將可怕嘅事，變成有趣嘅事。」
大規模生產嘅嘢食，特別令草間彌生覺得有壓力。佢話：「一諗到要不斷咁食通心粉咁樣嘅嘢……我就覺得恐懼同厭惡，所以我做通心粉雕塑。我一直做，一直做。」
草間彌生對呢種辛苦而重複嘅工作方式並唔陌生。二戰期間，十五歲嘅佢被日本皇軍徵召，有時會喺一間降落傘工廠輪班工作12個鐘頭。我哋仲可以將佢嘅創作實踐視為「女性勞動」 嘅昇華，例如喺呢件作品就係縫紉嘅工作，將本來重複單調、枯燥乏味嘅工序，轉化為創作嘅過程，藉此傳達佢嘅情感同恐懼。
呢啲作品係最早期嘅「軟雕塑」作品，呢種以布料同紡織物創造出立體形態嘅手法，喺六十到七十年代被好多藝術家採用。
旁述：
草間彌生有一系列利用日常物品創作嘅作品，其中有三件雕塑係呢類創作嘅初期作品，名稱分別係《無題積累》、《通心粉裙》同《無題（椅子）》。
《無題積累》係草間彌生喺1962至1963年間創作嘅作品，由10對尖頭高踭鞋組成，鞋入面有兩舊至四舊唔同形態嘅條狀物，有啲放咗喺鞋頭入面，有啲就凸咗出嚟。條狀物睇落好似粗身肉條，粗度有拇指同食指圈起咁粗，長度就由半截手指到成人全隻手掌不等。全部鞋同條狀物都油上白色顏料，睇起嚟就好似鞋入面生咗一條條軟身肉條，肉條向唔同方向凸出嚟，有啲短嘅向上伸，有啲長嘅就向上伸之後再向下彎，有啲就鑽入鞋頭入面。
《通心粉裙》係一條透視嘅芭蕾舞半截裙，由草間彌生喺1963年創作，條裙長約56厘米，闊約86厘米，連埋裙身凸起嘅條狀物，厚約18厘米。呢條銀白色紗裙質地堅挺，紗線織得比較疏，紗線之間形成一個個圓形網孔。裙嘅下擺有皺褶並向外撐開，裙身前方有一舊舊條狀嘅凸起物，由裙嘅中間位置延伸至下擺，大約有四、五十條，大部分聚集喺裙擺位置。呢啲凸起物有大有細，入面裝有填塞物料，睇落柔軟飽滿，佢哋之間夾雜住一條條彎彎曲曲嘅空心長條，好似長形通心粉。呢堆凸起物睇起嚟好似生長喺海邊岩石表面嘅藤壺生物。呢啲凸起物都油上白色顏料，紗裙嘅部分網孔畀白色顏料填滿。
《無題（椅子）》係一張有椅背嘅木凳，由草間彌生喺1963年創作，作品高81厘米，長93厘米，深92厘米。木凳嘅座位同椅背都佈滿脹卜卜嘅條狀物，一條條逼埋一齊，佢哋有長有短，大約有二、三百條，伸向唔同方向，睇落好似一堆生物嘅觸手，由木凳爆發出嚟咁，差唔多遮晒成張凳。當中，喺座位中央嘅嗰堆條狀物特別挺拔粗壯，約有成人前臂咁長。成張凳只有凳腳無凸起物，同座位、椅背上面體積豐厚嘅凸起物相比，凳腳顯得纖細。全件作品都油上白色顏料，部分位置灰白之中帶微黃，呈現陳舊嘅色調。