收聽
楊柏匡：
呢件巨型裝置名為《流星》，用你嘅雙眼喺呢個長方形嘅框架之間漫遊啦。草間彌生用手工縫製嘅填充布袋填滿咗八十四個框架，呢啲填充布袋向四面八方延伸，佔據咗井然有序嘅網格結構，好似野生嘅寄生藤蔓。呢啲銀色嘅纏結形狀，好似神經系統入面嘅突觸，激發起電流竄動。呢種組合隱喻咗一個不斷擴大嘅宇宙；或者可以代表小如細胞、大如天上面星星嘅事物。
1973年由紐約返到日本之後，草間彌生專注於應付心理焦慮同日益惡化嘅精神健康狀況。八十年代之後，佢逐漸接受自己作為日本前衛藝術先峰嘅身分，而且愈嚟愈受到國際藝術界嘅關注。1992年，佢創作咗呢幅作品，一年後，佢代表日本參加威尼斯雙年展，呢個係全球最重要、定期舉辦嘅當代藝術展。呢件裝置似乎散發住能量，象徵佢嘅壯志雄心同迸發嘅創造力。
旁述：
呢件作品嘅名稱係《流星》，係草間彌生喺1992年創作嘅裝置作品。作品高320厘米，長840厘米，厚30厘米，由四列橫排、21行直排、共84個長方體組件組成。每件組件入面都有一叢叢彎曲嘅條狀物。成件作品呈銀白色，枝條表面光滑，反射光線，睇落就好似一個個長方框，框住咗一捆閃亮嘅根莖。
每個長方體組件高80厘米，長40厘米，厚30厘米，呢啲組件入面，都有一叢彎彎曲曲嘅條狀物；條狀物裝有填塞物料，外形似植物枝條，有粗有幼，粗嘅有成人手掌嘅闊度咁粗，幼嘅大約成人手指咁幼，各有唔同形態。近睇，有啲枝條纏繞埋一齊，有啲就分前、中、後咁互相穿插，睇起嚟好似樹嘅根莖，又似放大咗嘅神經線；枝條之間有空隙，可以睇到另一邊嘅景物。離遠睇，作品就好似一埲巨型嘅牆，框起咗幾百條銀白色嘅根莖，同時將根莖反射光影嘅一刻定格起嚟。