收聽
譚雪凝：
為咗令更多人認識自己，草間彌生熱衷於探索唔同嘅表達方式。佢甚至開創咗自己嘅時裝品牌。喺呢度，你可以搵到佢為人體彩繪行為展演所製作嘅服裝。你仲可以喺房間另一邊嘅顯示屏，收睇呢啲展演嘅記錄影片。
除咗畫畫同雕塑，草間彌生喺六十年代尾，開始舉行激進嘅展演，嗰陣時佢住喺紐約。展演地點由現代藝術博物館到其他各種唔尋常嘅地方，例如華爾街同布魯克林大橋。當時正值反越戰同嬉皮運動席捲美國，草間彌生嘅作品明顯體現人與人互相連結同博愛嘅主題，呼應反主流文化高呼和平同平等嘅口號。
喺寫畀美國總統尼克遜嘅一封抗議越南戰爭嘅公開信裏面，草間彌生咁樣寫：「我哋嘅地球就好似幾百萬個天體裏面嘅一個波點，喺眾多和平而寧靜嘅天體裏面，地球卻係充滿住仇恨同衝突。等我哋改變呢一切，令呢個世界成為新嘅伊甸園……使用更多暴力並唔能夠終結暴力。」
草間彌生嘅展演吸引咗熱情嘅年輕觀眾。着住呢種誘人嘅服裝，佢哋嘅身體似乎由性別習慣同其他社會規範裏面解放出嚟。佢嘅展演吸引咗媒體關注同公眾大肆宣傳，喺咁樣嘅鼓舞之下，草間彌生好快就進入時裝銷售嘅領域。佢曾經透露，佢嘅設計喺400間商店發售，包括美國最知名嘅百貨公司之一布魯明黛。
旁述：
呢四件作品嘅名稱都係《無題》，係草間彌生大約喺1968年設計嘅表演服飾，佢喺現成衣物上面繪畫網狀圖案或者縫上凸起物。
作品《無題（裙）》，高73厘米，闊90厘米，係一件深V領配燈籠袖嘅上衣。呢件衫嘅局部位置染上粉紅色，當中混有灰色。從正面睇，件衫嘅右襟到腹部、左肩、兩袖以及衫腳位置，都縫上一堆堆灰色嘅凸起物，約有八十幾舊，呢啲凸起物好似一堆又粗又短嘅肉芽生喺件衫上面咁。
作品《無題（外衣）》，高約81厘米，闊約135厘米，係一件大圓領嘅黑色上衣，衫袖呈長兜狀，好似和服嘅闊袖咁。喺前襟同兩袖位置，畫有粉紅色網狀圖紋，網紋由一圈圈嘅弧形線條組成，弧線係粉紅色混有淡紅色，一條貼住一條，向唔同方向堆疊，形成一張網。喺前襟嘅網紋下方，有藝術家署名「KUSAMA」。
另一件同樣名為《無題（外衣）》嘅作品，高約81厘米，闊約118厘米，係一件大圓領配荷葉袖嘅白色上衣，荷葉袖嘅袖口好似一片向下垂嘅荷葉，肩膊同袖嘅交接位有縐摺。喺前襟同埋兩隻袖嘅袖口位，畫有黑色網狀圖紋，前襟嘅網孔有顏色點綴，由左襟至右襟，顏色由深紅色漸轉為淡紅色。而袖口嘅網紋呈長條形，網孔有紅點。喺前襟嘅圖紋下方，同樣有藝術家嘅署名。
作品《無題（彩繪外衣）》，高80厘米，闊160厘米，係一件淺口V領配荷葉闊袖嘅啡色上衣。喺前襟同兩袖位置，畫咗紫色網狀圖紋，網紋嘅邊緣位置混有淡紫色。