收聽
楊柏匡：
依家請你低頭睇睇呢啲唔同形狀、唔同大細、閃閃發光嘅金屬塊。佢哋好似液體咁嘅形態可能會令你諗起雲、水滴，甚至係細胞。當你睇到自己嘅倒影重複出現喺呢啲物體嘅表面，不斷遞增，你可能會有一刻迷失自我，感覺自己成為咗作品嘅一部分。
1957年，草間彌生由祖國日本飛去美國，第一次睇到漂浮喺太平洋上面嘅雲。呢一幕景像令佢留下咗深刻嘅印象，自此之後，佢利用各種媒介嚟表達呢種無邊無際嘅感覺。
草間彌生喺1984年第一次創作名為《雲》嘅雕塑。佢喺地板上面擺放咗一塊塊手工縫製嘅織物部件，佢哋嘅形狀同大細都同你眼前嘅物品相似。呢個2019年嘅版本總共包括九十個鏡面不鏽鋼部件。草間彌生運用呢種新材料，將軟雕塑所喚起嘅無限重複感，轉化為好似觀看萬花筒咁樣嘅體驗。
呢個版本嘅《雲》係佢第一次嘗試用不銹鋼去捕捉自然現象，展示咗佢喺自己嘅藝術生涯裏面點樣不斷創新。 每次展示《雲》都係獨一無二，就好似天空嘅雲層分布不斷變化咁樣。
旁述：
呢件作品嘅名稱係《雲》，係草間彌生喺2019年創作嘅裝置作品。作品包含九十件不鏽鋼雕塑，全部雕塑都鋪放喺地面，分散喺一個長約18米、闊約4米嘅靠窗地面空間展示。
九十件不鏽鋼雕塑都扁平闊薄，呈不規則嘅形狀，有大有細，比較大嘅有差唔多兩米咁長，半米咁闊；比較細嘅就大約半米咁長，20厘米咁闊。雕塑全部都係銀色鏡面，表面光滑，邊線圓渾，睇起嚟就好似一灘灘嘅水，因為唔同嘅張力而形成唔同嘅形狀咁。仔細睇，會見到水嘅表面有觀眾自己同埋周遭景物嘅倒影；好天嘅時候，仲會反映由窗外透射入嚟嘅陽光。而離遠睇，就好似一朵朵浮雲聚集喺地面，形成一片雲海。