收聽
譚雪凝：
草間彌生製作呢個紅花雕塑嘅時候，將填充物塞入勞工手套，將佢哋油成紅色。你可以將每隻五指手套想像成一朵小花，當手套重複出現喺花莖、花葉同花瓣，佢就好似細胞，不斷繁殖形成一朵巨大嘅花。
完成呢朵紅色嘅花冇幾耐之後，草間彌生擴展咗呢類創作，製作咗依家喺呢間房中央所展出嘅花卉雕塑。佢嗰朵有少少枯萎嘅《紅色的花》，演化成好似怪物一樣呈現生物形態嘅植物，伸出手臂支撐軀幹，散發住活力。
草間彌生將創作藝術呢個行為描述為「喺絕望入面迸發熱情」，並且繼續重塑佢嘅實踐。呢件作品表達咗佢希望活得好似一朵紅花——象徵住克服障礙，突破限制而崛起，最終成長同再生。
旁述：
呢件作品嘅名稱係《紅色的花》，係草間彌生喺1980年創作嘅軟雕塑，創作物料包括棉手套、布料同棉質嘅填塞物料。雕塑柔軟咁擺放喺地面，高52厘米，長467厘米，闊106厘米。作品形態好似一支摘咗落嚟嘅巨型紅花，成支花連花莖都係鮮紅色，外型睇落好似太陽花。
呢支花軟腍腍咁瞓喺地面，大約有三個成人張開雙臂、手拖手咁長。除咗花蕊嘅位置，成支花都好似生咗肉芽嘅增生組織。細心睇，呢啲肉芽係由染咗紅色嘅手套組成，一隻疊住一隻，每隻手套都脹卜卜。
花莖長而彎，莖嘅中段，左右兩邊各有一條短身嘅枝條，大約係花莖長度嘅五分之一，望落好似係喺花莖中間伸出一對彎彎嘅小手。花莖嘅其中一端，連住一個巨型花蕊，花蕊呈橢圓形，圓碌碌好似一隻巨蛋，大約有成人雙手環抱咁大。花蕊嘅外圍，圍咗一圈茂密嘅花瓣，花瓣同呢枝花嘅其他部分一樣，都係由一隻隻染紅咗嘅手套組成。