收聽
楊柏匡：
呢幅畫名為《人類的意象》，表達咗草間彌生對於我哋嘅存在係彼此相連嘅睇法。大大小小嘅白色波點，覆蓋咗一片紫色嘅領域。你可能會發現，大多數細嘅波點都有一條小尾巴，呢啲尾巴有時會同其他波點相連。每粒點睇起嚟都好似蝌蚪或者精子。
如果你退後一步去睇呢幅畫，佢嘅構圖可能係銀河嘅圖像。由左到右仔細咁睇呢件作品，你可以睇到唔同畫板上，波點嘅密度係點樣變化：左邊嘅點更加大，間距更加近。當你嘅眼睛喺畫板上漫遊嘅時候，呢啲點似乎會慢慢分散，產生一種佢哋郁緊嘅感覺。
如果你將一粒點視為一條生命，呢件作品就可以從更宏大嘅角度理解為萬物一體，我地喺當中彼此相連。佛教嘅輪迴觀念影響咗草間彌生嘅世界觀。佛教教義描述咗我哋點樣喺無限嘅時間裏面，經歷無數次人生。咁樣亦意味住喺眾多嘅生命歷程裏面，我哋都同其他人有關係。望住呢幅畫，你可能會覺得我哋嘅生命只係漫長存在裏面嘅一瞬間，就好似銀河入面嘅一粒塵埃。
對草間彌生嚟講，佢嘅點充滿住精神意義，而且象徵住重生，呢種重生係通過能量轉換同恆常運動而造就嘅。佢話：「波點唔能夠單獨存在；就好似大家嘅日常交往一樣，兩三個或者更多嘅波點就形成咗動態。地球只係宇宙間無數繁星裏面嘅一個波點。波點係通向無限之道。」
諗住草間彌生嘅觀點，再睇睇呢幅《人類的意象》。你喺作品裏面睇唔睇到萬物一體嘅表現呢？就好似所有生物都係由細胞組成一樣，所有人類都係芸芸眾生嘅一個構成部分，而成個宇宙都係蘊藏喺一個細胞之中。
旁述：
呢件作品嘅名稱係《人類的意象》，係草間彌生喺1987年創作嘅塑膠彩布本作品。佢由三幅畫作併合而成，整體高194厘米，長390.9厘米。作品底色係紫色，上面佈滿大大細細嘅白色圓點，每個圓點都帶有一條彎曲嘅尾巴，好似一條條白色精子游走於畫面各處，呈現唔同形態。
一組三幅嘅作品分成左、中、右：左邊嘅一幅，唔同大細嘅精子集結喺一齊，數量好多，約有二、三千條，幾乎密鋪畫面，佢哋無重疊，每一條都可以清晰見到渾圓嘅頭部同幼細嘅尾巴；而中間同右邊兩幅嘅精子同樣係大細混雜，大部分嘅精子都比左邊嗰幅嘅大，大嘅有成人拇指指頭咁大，細嘅有成人尾指指尖咁細，而精子之間嘅空間，比起最左邊嗰幅更加多。睇起嚟好似放大咗一堆精子，精子擺動尾巴游向四方八面，細條嘅精子好似游向遠處，大條嘅精子就好似游近觀眾，充滿動感。