收聽
譚雪凝：
依家擺喺你面前嘅作品叫做《原子彈》，係草間彌生喺1954年畫嘅。呢個畫面就好似一幅地形圖，有幾十條漩渦形狀嘅黑色線，位於兩道用紅色墨水畫嘅條紋上面，其中一條比另一條更巨大。
1945年，美國向日本廣島同長崎投下原子彈嘅時候，草間彌生十六歲。幾十萬人罹難，其中大部分係平民百姓。草間彌生喺佢漫長嘅藝術生涯裏面，經常會以戰爭以及戰爭嘅恐怖作為創作主題。
呢啲畫作提醒我哋，可能要花上一輩子，先可以消化我哋經歷過嘅某啲事件，尤其係創傷事件。我哋或者會喺生活嘅唔同時刻，諗返起令人難過嘅場景，但係時間賦予我哋全新嘅層次同視角去看待佢哋。
旁述：
呢件作品嘅名稱係《原子彈》，係草間彌生喺1954年創作嘅水粉、墨水及粉彩紙本作品。圖像高25厘米，長17.6厘米；連畫框就高47厘米，長約40厘米，厚5厘米。
畫作呈現一個洞口，有一條狀似巨型毛蟲嘅條狀物，隨住洞口外冒起嘅一團巨大白煙出現。
喺畫面左右兩邊同上方，有不規則形狀嘅黑色邊框，右邊同埋上方嘅邊框向內呈尖刺狀，似一隻隻爬行類動物嘅短腳，成個畫面就好似一個又黑又奇異嘅洞口，洞口外面有一片淡淡嘅紫藍色。洞外嘅下方有一條斜坡，由一條條打直嘅幼黑線組成，垂直並排嘅黑線靠左邊嘅矮啲，靠右邊嘅就高啲，形成一道向右斜上嘅斜坡。
一條血紅色夾雜黑色嘅條狀生物，由洞底向上直穿出去，再喺高處彎向左邊，似乎張開口吞噬緊另一個球形生物。條狀生物約佔畫面五分之四嘅高度，身體係血紅色，邊緣呈鋸齒狀，似一隻隻短小嘅腳。條狀生物嘅身上，好似有黑色嘅攣毛同埋長鬚依附而生，啲攣毛好似一張黑色嘅網罩住全身。而喺左邊，好似畀條狀生物吞噬緊嘅球形生物呈暗紅色，有黑色幼毛向外生，表面同樣畀一堆好似網咁嘅黑色攣毛包住。喺呢啲生物嘅左邊，有廿幾條好似毛髮嘅黑色幼線，從半空中飄落，每條毛髮上各有四、五點黑色點，似一粒粒黑色串珠。
喺洞外遠方嘅斜坡，有一團白煙，好似喺斜坡爆發向上衝，然後喺空中聚成一團。煙霧之間隱現一浸浸黃色、橙色、紫紅色同藍紫色，好似白煙冒住火光咁。
畫作左下角有紅色細字，分三行寫住「1954 YAYOI KUSAMA」。