收聽
楊柏匡：
草間彌生1958至1973年喺紐約生活同工作，喺紐約返返日本嘅三年後，佢創作咗《神經的死亡》。呢幅扭嚟扭去嘅巨型作品，反映咗佢喺呢個時期疲累嘅精神狀態。佢唔單只筋疲力盡，而且仲承受住失去摰愛嘅痛苦，包括佢嘅爸爸草間嘉門，同佢嘅密友、美國藝術家約瑟夫·康奈爾。
如果你用雙眼沿住呢件引人注目嘅裝置，從頭到尾咁睇，你會發現佢係一件連續不斷嘅作品。懸吊喺半空嘅部分垂到地面，好似佢哋已經耗盡全力，瀕臨死亡。黑點散落喺米色嘅表面上面，勾起疾病同腐爛嘅意象，凸顯出精神崩潰嘅意念。同時，呢個軟雕塑令觀眾諗起蛇或者蟲，係生命力強韌嘅生物。
由十歲第一次出現幻覺開始，藝術就成為咗草間彌生嘅治療方式。為咗創作《神經的死亡》，佢喺一條100米長嘅織物上面畫波點，成條織物都係佢親手縫製嘅。呢個耗時費力嘅過程，令佢能夠按照自己嘅節奏，排解悲傷同埋其他複雜嘅情緒。
草間彌生認為藝術係治癒痛苦、焦慮同恐懼嘅唯一方法，直到今日，佢仍然創作緊新嘅作品，包括懸掛喺M+光庭嘅彩色裝置，由一樓嘅地下大堂到B2層嘅潛空間都可以睇到。雖然呢兩件作品嘅形式同標題都好相似，但係草間彌生嘅大型新作《神經的死亡》充滿住喜悅，反映佢喺過去四十年裏面，經歷咗巨大嘅轉變以及得到治療。
旁述：
呢件作品嘅名稱係《神經的死亡》，係草間彌生喺1976年創作嘅裝置作品。作品係一條塞滿填塞物料嘅紡織物，總長100米，直徑約15厘米。
呢條紡織物好長，好柔軟，部分位置被吊起，掛喺牆度，或者吊喺天花板度，然後再髧落地，彎彎曲曲咁軟垂喺地面或者喺地上延伸開去。
紡織物嘅表面係棉質，入面有填塞物料。全條紡織物嘅粗度都唔一致，有部分較扁平，有部分就較圓渾。紡織物嘅表面係偏白嘅米白色，帶有黑點，黑點有成人拇指咁大，邊緣嘅黑色化開，睇起嚟好似發霉嘅斑點。紡織物每隔一小段就有一個好似肉芽咁嘅凸起物，約有成人手掌咁長，似係由主幹分岔出嚟嘅短小分支。
成件作品好似放大咗嘅神經組織，神經線喺唔同位置岔開或者交疊。