收聽
譚雪凝：
如果你退後一步，從整體上睇呢一間房，你會注意到草間彌生嘅風格同技巧上嘅變化有時隱約有時明顯。而最明顯嘅，大概係草間彌生難以抑制、對於連結同治癒嘅渴望。
喺房間嘅一道牆，你會睇到大量嘅畫作，佢哋屬於《我永遠的靈魂》系列，呢個系列由2009年一直延續到2021年。你欣賞呢啲作品嘅時候，可能會發現類似《無限的網》系列嘅圖案。依家將你嘅目光投向睇落好似阿米巴變形蟲嘅形狀，佢哋似乎經歷緊自我消融。某啲畫作裏面嘅形狀、面孔同人物，似乎喺「原生湯」裏面好開心咁漂浮緊，當中有一啲常見嘅細胞形狀由構圖中心放射出嚟。
你可能會發現呢啲畫作有好多都係正方形嘅。草間彌生最近畫嘅呢啲作品，並唔係喺工作室入面製作，而係喺佢入住多年嘅病房裏面完成。呢啲畫布通常係正方形，尺寸比佢之前嘅作品細一啲。
草間彌生喺佢嘅創作生涯，不斷重複一啲動作同姿態，呢個過程造就咗非凡嘅「身體記憶」。佢話:「面對畫布嘅時候，我嘅腦袋係空白嘅。當我開始畫畫嘅時候，佢自自然然咁樣豐富起嚟，喺我嘅腦袋裏面蔓延。」
令人感到興奮嘅係，九十三歲高齡嘅草間彌生，仍然係藝術界嘅一股活力，佢嘅作品反映咗生活中嘅悲歡離合；但重要嘅係，喺日益分裂嘅世界裏面，佢繼續用團結同治癒嘅訊息，激勵住觀眾。
旁述：
喺一幅長約27米嘅白牆上，掛咗超過三十幅塑膠彩布本作品，全部都係來自草間彌生創作嘅《我永遠的靈魂》系列，顏色鮮艷奪目。其中三幅畫作，名稱分別係《當愛在兩人之間萌生》、《安息之沼》同埋《在天空飛舞的靈魂》，係草間彌生分別喺2018、2014同2016年創作嘅作品。每件作品高194厘米，長194厘米，呈正方形。作品包含草間彌生嘅招牌元素，包括不斷重複又密集嘅眼睛同人面、好似放大咗嘅細胞同網狀圖案，以及散射狀嘅排列等等。
作品《當愛在兩人之間萌生》係橙紅色底色，中央位置有上下兩團顏色，上方形狀較圓嘅係藍色，下方較扁嘅係紅色，兩團色塊佔畫面大約一半高度，兩者嘅邊線近乎黐埋一齊。畫面四邊有大約一百三十條粗黑線，由四方八面擠向中心點，睇落好似要爬近中間兩團色塊。全部黑線都無重疊。呢啲粗黑線睇起嚟似毛蟲，邊沿突出細小鋸齒似短腳，身體入面排滿一隻隻眼睛。呢啲毛蟲有長有短，有啲有成人一條腿咁長，有啲就同成人手指嘅長度差唔多。有啲毛蟲嘅身體會分岔成幾條，或零星突出一兩截，突出嘅部分排列咗一兩隻眼睛。
作品《安息之沼》係黃色底色，畫有不規則嘅彩色邊框，方框內有六十幾個不同形狀嘅圖案，好似一堆細胞或微生物，大部分嘅邊線圓滑無稜角，形狀不規則，當中混雜人嘅面孔、眼睛、圓形網點、好似腳仔咁嘅鋸齒形狀等等。呢啲圖案分散喺成個畫面，無重疊，有大有細，大嘅大約有兩張A3紙咁大，細嘅就同杯墊差唔多。呢啲圖案當中，有一啲細胞好似吞噬咗有觸鬚圍邊嘅生物，生物入面套住一張人嘅側面；有啲就呈長條狀，似無殼蝸牛，身體入面有三十幾張人嘅側面，重複排列成一串；有啲細胞內有一條魚，細胞外有魚鰭同一對短腳；仲有啲細胞係空心嘅。大部分細胞都帶有網點，亦有部分係由一隻隻眼睛組成。睇起嚟，呢啲細胞好似聚埋一齊，浮游喺方框入面。圖案用上紅色、橙紅色、黃色、綠色、青綠色、天藍色、紫色同黑色等等，整體色彩繽紛。
作品《在天空飛舞的靈魂》嘅底色係一片紫色，透出密集又細碎嘅橙紅色網點，每粒網點大約係成人手指頭咁大，四邊畫有淺藍點嘅黑色邊框。框內，有八個唔同顏色同形狀嘅物體，似係細胞或微生物，喺紫色空間之中浮游。呢八個物體分散喺畫面唔同地方，以畫心作為鐘面中心點，物體嘅位置大致係喺12點、1點、3點、5點、7點、8點、9點同10點方向，呢啲物體離中心點有近有遠。喺12點方向嘅一隻蛋形物體比較接近中心點，係由紅色嘅網組成，帶有黑色網點；1點方向嘅就遠啲，係一隻似牛角嘅生物，由橙色嘅網組成，帶有白色網點；5點方向嘅又近返中心點一啲，係由天藍色嘅網組成，帶有淺藍色網點，呢個物體左邊比較脹，右邊比較修長扁平，好似橫向推進。