收聽
草間彌生，《南瓜》，2022年。藝術家自藏，鳴謝大田秀則畫廊。© 草間彌生
楊柏匡：
你最初認識草間彌生，可能係透過佢嘅戶外南瓜雕塑，無論你係親眼睇到，或者喺社交媒體上面見過。波點南瓜雕塑除咗適合喺網絡上打卡之外，呢種由土壤中生長嘅植物，仲體現到草間彌生嘅信念，即係萬物有靈，必須擁抱同讚美當中嘅差異。
草間彌生細個嘅時候，屋企裏面有一個苗圃，佢嘅童年回憶有好多同南瓜相關嘅畫面。佢記得同爺爺一齊喺園地入面仔細觀察南瓜，當佢採摘南瓜嘅時候，睇到渴撻撻嘅液體由南瓜莖入面滲出嚟。佢一直對南瓜既迷人又怪誕嘅模樣感到着迷。
喺M+嘅地下大堂，你會發現草間彌生嘅兩個南瓜。大大細細嘅黑色波點，沿住黃色葫蘆形嘅輪廓排列，凸顯佢哋嘅曲線。比較高嘅南瓜微微傾斜，好似垂頭喪氣咁。另一個南瓜嘅身體圓碌碌，底部下塌扁平，就好似喺到休息。
人有各種各樣嘅體型同性格，草間彌生嘅每個南瓜都有唔同嘅形狀同特徵。佢話：「我鍾意南瓜。南瓜最吸引我嘅地方係佢大方樸實。」正正係呢種大方樸實嘅感覺，令到南瓜成為佢最為人熟悉嘅圖案之一。
旁述：
呢件作品嘅名稱係《南瓜》，係草間彌生喺2022年創作嘅雕塑，材料包括鑄鋁同聚氨酯漆。作品為一組兩件巨型南瓜，一高一矮，高嗰件高300厘米，長約170厘米，深約176厘米；矮嗰件高160厘米，長約284厘米，深約272厘米。兩個南瓜座地展示，一個裝設喺另一個嘅旁邊。
呢兩個巨型南瓜都係黃色底色配黑色圓點，佢哋各有唔同形態。高嗰個南瓜外形修長，整體上下嘅長度同闊度都差唔多；矮嗰個就又扁又闊，頂部位置最窄，愈近底部就愈闊，底部比起頂部闊約兩倍，睇落就好似南瓜向地面融化咁。
南瓜嘅表面有拱起同凹陷嘅地方。每個南瓜大約有七至八個位打直由頂至底咁拱起，拱起嘅地方睇落堅實飽脹，而凹入去嘅位置就形成垂直嘅坑。另外，南瓜嘅表面打直排滿一串串圓點，喺拱起嘅位置，圓點較大，最大嘅大約有一隻成人手掌咁大；而喺凹陷嘅位置，圓點就較細，最細嘅大約只有一節手指頭咁細。愈近拱起嘅地方，圓點就愈大，就係咁，南瓜皮上嘅一串串黑色圓點，由細到大，由大到細，不斷重複。
每個南瓜嘅頂部都有粗壯嘅果柄，呈圓柱狀，直徑約有一張打直嘅A4紙咁闊。果柄連接果實嘅蒂同樣佈滿圓點，但顏色同果實相反，係黑色底色配黃色圓點。