王菀之：
我最初睇到嘅係圓點，慢慢先發現每一個點都係獨特嘅，就好似係生命體無限伸延，編織成網，種出南瓜。我好讚歎，亦都好好奇，點解喺平面上面加圓點，就可以令人睇到一層層嘅變化，甚至睇到無限⋯⋯
草間彌生嘅作品同佢自身嘅生命係緊密連繫嘅，我第一次睇到就已經非常感動。呢種生命力同詩意令我更加想深入了解佢嘅作品。自此，去草間彌生嘅展覽欣賞佢嘅作品，成為我喺藝術創作路上嘅一種學習，亦都變成我每一次旅行一定要做嘅事。
呢幾年來我開始更專注自己嘅藝術創作。無論係音樂上同視覺上，我都不斷地摸索、探討同埋實踐。其中一個項目呢，我係希望創作一張專輯，全部都同藝術有關，亦都希望藉住自己嘅音樂作品向藝術家致敬，同更多人分享我鍾意同欣賞嘅藝術家。 專輯裏面第一首向藝術家致敬嘅歌呢就係《波點女皇》喇。有一次，我企喺日本街上面嘅十字路口度，霓虹燈圍住我閃個不停，刺激我嘅視覺，帶我嘅思緒進入咗不斷變化嘅色塊。我諗起紐約時代頭髮長長嘅草間彌生、喺河上面釋放波點嘅草間彌生、喺花園裏面放置巨型銀色波點嘅草間彌生、企喺《無限鏡屋》嘅草間彌生、寫緊小說讀緊詩句嘅草間彌生、畀自己嘅作品圍住而且渴望畀人睇到嘅草間彌生、每日仍然不斷創作嘅殿堂級草間彌生⋯⋯ 令我即時感覺充滿力量。腦裏面閃動嘅畫面呢就變成旋律同埋我編曲嘅方向喇。
草間彌生嘅故事亦都啟發咗我，只要不斷努力創作、忠於自己嘅表達，或者自己嘅作品都有機會向更多人分享，甚至有機會成為人地嘅啟發同靈感，成為佢地生命裏面嘅一點光芒。 依家我欣賞草間彌生嘅作品，睇到嘅唔單只係波點、南瓜、或者拼湊而成嘅雀鳥同花朶，我更加睇到嘅係藝術家內心充滿爆發力、永恆而且細膩如詩嘅宇宙觀。
我係一個Artist，我係Ivana。