收聽
M+，香港，© expired，圖片：M+, Hong Kong
曹慰祖：
我會話呢個項目改變咗我嘅生命，甚至係成就咗我嘅人生。
旁述：
呢個係曹慰祖。1979年，佢係著名美藉華裔建築師貝聿銘旗下一名年輕助理。喺美國，貝聿銘當時啱啱贏咗北京香山飯店嘅設計、建造同裝修工程嘅委約，而呢盞華麗嘅枱燈係其中嘅一小部分。
曹慰祖當時喺北京現場，負責將貝聿銘嘅設計赴諸實行。
曹慰祖：
對貝聿銘嚟講，佢想利用呢個機會嚟探索一啲對佢非常深刻、有共鳴而且好重要嘅嘢，就係要將佢所學到嘅應用返喺祖國身上。佢仲有一個獨特嘅使命，就係要恢復果種對土地、歸屬感，以至大自然同建築環境關係嘅中國傳統思維。
旁述：
呢盞燈係曹慰祖同室內設計師John Morford合作嘅成果，亦將貝聿銘嘅視野體現喺酒店各個方面之中。酒店嘅中庭係一個好大但私密嘅休息區，而盞燈嘅設計係為咗提昇中庭嘅感性氣氛。
曹慰祖：
我哋決定要將光線引入空間入面嘅物件上；光源可以向下然後反射。而呢種光線比起直接將光線照喺塊面度，會令人更加好睇。當光線射向下，咁當然，盞燈嘅主體亦一定要係好靚。所以，我哋就決定簡簡單單就可以，就圓柱型啦。
旁述：
設計完成之後，曹慰祖同當地嘅工匠緊密合作，利用傳統嘅景泰藍金屬加工技術，造出冰裂紋圖案。正如曹慰祖之前所講，呢種共同協作嘅做法，以及對地點同空間嘅敏感度，從根本上改變咗佢日後嘅工作方式。
曹慰祖：
對我嚟講，身為一個建築師，我哋係服務人，唔剩係領導而係會引導，有責任從開始令世界連結起嚟。喺呢個項目，我要同一啲幾乎同我係完全唔同世界嘅人合作，喺嗰兩年嘅過程中，我哋不知不覺成為咗一家人，大家都努力令呢個項目盡善盡美。即使喺今日，我每次諗番起都仲會非常激動。我哋建立嘅手足之情，要一直銘記，我哋並唔孤單。呢個係我工作嘅座右銘，一切都要歸功於我喺呢個項目上嘅經歷。
旁述：
中國北京香山飯店檯燈，係貝聿銘、曹慰祖同約翰・莫福德喺大約1982年設計嘅燈具，媒材包括金屬、玻璃同青銅線，高47.5厘米、長40.5厘米、闊40.5厘米。
檯燈由下而上包括燈座、燈柱同燈罩三個部分，以圓形同圓柱為主要設計。燈具以象牙白色為主，表面光滑而且帶有光澤，佈滿青銅色嘅碎裂紋理。燈座為圓形，燈柱為圓柱狀，燈座同燈柱無縫接合，連成一體，燈柱就好似喺燈座中央直接拉高成圓柱狀，邊線彎曲角度自然流暢。燈罩為兩個同心圓，似係一個有厚度嘅圓餅，外襯一個厚身啲嘅空心圈餅。內圓直徑同燈座差唔多闊，外圈直徑就比燈座闊差唔多三分之一，內圓同外圈有一線罅隙，只係喺3點、6點、9點同12點鐘位置裝有幼金屬枝連接。喺側面睇，內圓比起外圈大約高六分之一，睇起嚟外圈就好似懸浮喺半空咁。
燈座嘅圓邊裝有一條電線，接駁住一個白色平頭插頭；電線同插頭整齊綁好，紮成一紮。