返回

收聽

修復保管中心 

雞記分店有限公司、環球光管公司 「雞記蔴雀耍樂」觀塘分店霓虹招牌

1976

M+,香港,鷄記分店有限公司捐贈,2013年,© Kai Kee Fun Den Co.Ltd,圖片:M+,香港

旁述:

你記唔記得觀塘裕民坊嗰隻大公雞霓虹招牌呢?

嗰個就係「雞記蔴雀耍樂」觀塘分店嘅大招牌,即係面前呢個。佢喺1930年代所創立香港嘅第一間麻雀館。雞記呢個名背後有個有趣嘅故事。

林偉森:

我係雞記麻雀第三代林偉森 Wilson。

我阿爺林坤喺1911年佢十三歲嘅時候,佢一個人獨自喺廣東新會偷渡上船來香港。來香港後佢無依無靠,唯有喺廟街嘅天后廟門口露宿,剛好天后廟個廟祝見到佢嘅身世咁可憐,於是收留咗佢,仲介紹咗份工比佢做。喺雞欄打工阿爺都好勤力,亦能夠有啲積蓄,到雞欄嘅主人退休時就買咗佢個檔口,好多街坊都好鍾意幫襯佢買雞,因為唔知道佢個名,所以阿雞、阿雞咁叫佢。

1932年嗰時阿爺已經轉行賣利潤比較高嘅水果,但街坊仍然叫佢做阿雞。有一晚阿爺發夢 ,夢見雞啼叫醒佢,於是果日佢一早起身,都好早就賣清咗水果,經過士多買咗張馬標,好好彩佢贏咗 105 元,果時一百蚊已經可以買一個單位,阿爺用贏來嘅錢喺廟街買咗間士多。果時啲街坊無地方可以去,所以佢哋會去士多同街坊打麻雀,點知越來越多街坊去阿爺度打麻雀,佢於是決定唔做士多,租埋隔離個鋪做麻雀館。

旁述:

從油麻地廟街開始,雞記後來喺唔同地區開分店。佢哋每一間分店都會有一個霓虹光管招牌,用嚟吸引顧客。而觀塘呢個因為位處於小巴同巴士站上面,好自然就成為個區嘅地標。


林偉森:

我爸爸第二代嘅雞叔,比較有遠見,佢見到政府發展呢區,將會係一個衛星城市,亦有好多工廠區,工廠區比較多啲客,所以我爸爸因為呢個就開咗喺觀塘。當時太多人,燈火都比較暗,所以個招牌可以令個區都光亮啲,好遠都會見到呢個招牌。

當年霓虹光管最大嘅功用就係作為廣告,所以招牌越大越好,色彩越多越好,越吸引越好。好多招牌用咗好簡單嘅標誌去展示,例如森美牛扒屋用咗一隻牛,金龍酒樓用咗龍,駱駝漆用駱駝,當然雞記就用一隻生動嘅大公雞表示咗我哋公司嘅標誌。

旁述:

當你離開博物館走返入城市空間,見到唔同嘅霓虹燈嘅時候,可以想像一下,佢哋其實都好似雞記蔴雀咁,蘊藏住一個個引人入勝嘅故事。

旁述:

「鷄記蔴雀耍樂」觀塘分店霓虹招牌,係環球光管公司喺1976年製造,媒材包括真空玻璃管、氖氣、鐵皮、鋼同油漆,高127厘米、長559厘米、闊51厘米。

招牌係一塊巨型嘅橫度長方形金屬底板,長方形內有中文字,而底板上方有一個公雞圖案,睇起嚟就好似一隻公雞企咗喺長方形橫額上咁。呢個霓虹招牌,原本係安裝喺麻雀館外嘅高處,橫跨行人路同馬路嘅上方,以便喺遠處都可以見到呢面巨型招牌。

金屬底板呈粉藍色,襯粉綠色邊框,底板由多塊細板組裝而成,部分駁口位滲出鏽跡。底板沿邊裝有霓虹燈幼玻璃管,呢啲玻璃管經高溫燒製,再用人手屈曲而成,着咗燈嘅話會呈橙紅色。呢塊金屬底板上,有「鷄記蔴雀耍樂」六個中文字,都係以白色金屬板裁切而成,由右至左裝設喺招牌度。呢啲中文字以霓虹燈幼玻璃管勾勒字型,字體中空,着燈時,燈管橙黃色嘅光線反射喺白色底板上,就好似填滿咗字體嘅中空部分,令呢啲字睇起嚟加粗咗。金屬底板嘅頂邊中央位置,另外加咗一個公雞圖案,同樣係以金屬板裁切公雞側身嘅外形,並描上淡淡嘅紅色、藍色、黑色等油漆。公雞挺起身,雞尾豎起,睇起嚟精神抖擻。呢隻公雞嘅大細係下方中文「鷄」字嘅一倍半左右,企喺「蔴」字嘅上方。雞頭朝向右邊嘅「鷄」字,雞尾朝向左邊嘅「樂」字,雞頭、雞冠同腮邊塗上紅漆,雞身為啡紅帶黑色,豎起嘅雞尾則為粉藍帶綠色,一對雞爪係黃色。公雞嘅外形同樣以霓虹燈幼玻璃管勾勒,着燈嗰陣,雞嘅邊線為橙紅色,翅膀係綠色,雞尾同雞爪呈橙黃色。

招牌採用單面設計,背面並無裝設霓虹燈。