森美餐廳、富華光管工程有限公司 「森美餐廳」霓虹招牌

葉鳳儀：

我叫葉鳳儀，我本身爸爸葉聯Sammy就係經營我哋而家呢間餐廳森美餐廳，經營左幾十年，因為我爸爸經營開，我就繼續幫佢運作呢間餐廳。我爸爸畫了一隻安格斯牛做一個招牌，話比人知食牛扒，只係一個標誌展示安格斯牛放咗出面，成條街係得一隻。

旁述：

呢隻牛一直都係社區入面最標誌性嘅霓虹燈招牌。當有關部門通知森美隻牛有安全隱憂而需要移走嗰陣，M+介入咗呢件事。作為一間視覺文化博物館，M+一直致力收藏同香港有密切關係嘅視覺標誌。森美餐廳隻牛係M+首個收藏嘅霓虹燈招牌。隻牛陪住間餐廳咁耐，而家搬咗去新嘅屋企，我哋問過葉鳳儀有咩感受。

葉鳳儀：

我哋以前對面喺啲舊樓，舊樓有啲露台，以前種好多葵、好多樹，隻牛對住咗啲樹，遠望隻牛就真係好似有草食咁，同埋又會覺得隻牛有草食好似後生啲，好似好年青咁。慢慢會覺得隻牛好似老咗咁，幾十年之後，對面嘅建築物改晒，覺得隻牛會老咗。而家入咗博物館，隻牛要休息下喇，退休喇。

因為賣咗隻牛好似唔太應該，佢係我哋嘅親人，冇理由賣咗自己嘅親人㗎嘛，所以冇想過要賣。所以去咗博物館都可以成為歷史，有一個地方比佢。

旁述：

呢隻牛仲有一個意想不到嘅後續，因為人人都太習慣佢喺森美餐廳上面，搬走之後，引起咗一啲估唔到會發生嘅問題⋯⋯

葉鳳儀：

拆咗隻牛之後有啲街坊返嚟話我知，喺呢度住左幾十年仲可以落錯車，因為以前坐響車入面，感覺到牛嘅光線，知道仲有一個站落車、仲有兩個站落車，當你無左隻牛之後，無咗嗰種光線，你會唔知落車個站去咗邊，當你掹大眼為意時已經過左站 。住喺呢度幾十年都可以搭錯車，錯過站。就因為隻牛影響好大，因為慣咗個招牌 。

旁述：

「森美餐廳」霓虹招牌，係大約喺1978年由餐廳創辦人葉聯設計、富華光管工程有限公司製作，招牌高360厘米，長450厘米，厚度為40厘米，材料為真空玻璃管、氖氣、氬氣、鋅、鋼同油漆。

呢個霓虹招牌，原本係安裝喺位於皇后大道西嘅森美餐廳門外，懸掛喺道路上空。招牌係一塊巨型嘅金屬底板，形狀係一隻牛嘅全身輪廓。成塊底板油上深啡色，部分油漆裂開、捲起，甚至已經剝落，見到底板原本嘅銀色。底板沿邊裝咗霓虹燈幼玻璃管，呢啲玻璃管經高溫燒製，再用人手屈曲，勾勒出安格斯牛龐大健碩嘅牛身側面：牛頭有兩隻短小嘅牛耳，有圓圓哋好似一粒杏仁嘅牛眼，牛嘅四蹄着地，腹部近後腳有牛嘅陰莖凸出，牛尾下垂。着燈嗰陣，燈管呈白色。

牛身有餐廳嘅中英文字樣，打橫分三行排列，字型都係以霓虹燈勾勒，第一行係「SAMMY’S」，第二行係「KITCHEN LTD.」，全部係大寫斜體英文字，字體中空，呈熒光綠色。呢幾個英文字襯有綠色底板，底板同字體一樣大，着燈嗰陣，燈管熒光綠嘅光線反射喺綠色底板上，好似填滿咗字體嘅中空部分，令字體睇起嚟加粗咗。第三行係由右至左排列「森美餐廳」四字，字體比英文字細一半，呈橙紅色。呢四個中文字襯有紅色底板，底板同字體一樣大，着燈嗰陣，燈管嘅紅光反射喺紅色嘅底板上，同樣有填滿同埋加粗字體嘅效果。

招牌前後兩邊設計相同，猶如一隻牛嘅左右兩側。