雲溪 《百鬼夜行繪卷》

湯本豪一教授係湯本豪一紀念日本妖怪博物館（又名三次妖怪博物館）嘅名譽館長。

（配音）湯本豪一：

响日本文化入面，成日流傳住一啲故事﹐提及喺黑夜裏面，會撞見一堆古靈精怪、類似怪物嘅生物，聯群結隊咁遊行。呢一支隊伍就叫「百鬼夜行」。而呢啲怪物，就係大家平時講嘅超自然生物——妖怪。

究竟乜嘢先算係妖怪？其實冇一個簡單嘅定義。就算你問一百個專家，佢哋嘅答案都未必一樣。

有啲人相信萬物皆有靈，連物件都唔例外。好似一張書枱、一部電腦或者一張凳，用咗好多年之後，都可能會擁有靈性。喺呢幅百鬼夜行繪卷入面，我哋會見到一堆被人類丟棄嘅日用品聚埋一齊。佢哋明明忠心耿耿咁服務咗人類咁多年，竟然換嚟被拋棄嘅下場。於是佢哋合力搞搞震，向人類報復。就係咁樣，呢啲物件就變成咗妖怪。

廣義嚟講，妖怪源於人類對大自然嘅恐懼、內心嘅焦慮，仲有出於某種直覺，個心總係縈住黑暗之中有啲無形嘅事物喺度蠢蠢欲動。

對我哋嘅祖先嚟講，黑暗喺佢哋日常生活中所佔嘅影響，遠比今時今日更大。嗰陣時，一到夜晚，只要踏出門口半步，就已經被一片漆黑包圍。我哋自不然想像到，喺我哋身處嘅世界之外，仲有另一個未知嘅世界，而嗰度亦有某啲生物喺度活動緊。

以前嘅人面對天災、瘟疫或者其他不測，根本無能為力。好多時候，除咗咬緊牙關、等件事過去，或者虔誠祈禱、希望避過一劫之外，別無選擇。

呢啲經歷，令大家意識到有一股遠超人類所能理解嘅強大力量。久而久之，妖怪嘅概念逐漸成形。

呢件作品嘅名稱係《百鬼夜行繪卷》，係由雲溪喺日本江戶時代（1603–1868）創作嘅彩色水墨紙本，高約32厘米，長約6米。

展開手卷後，由右至左觀賞，可見日落後有過百隻妖怪喺大街巡遊。妖怪嘅形態、大小各有不同，造型怪誕。其中有一啲妖怪係由工具、摺扇、樂器等日用品變成，以擬人化手法呈現。呢啲日用品喺夜晚化為妖怪，向丟棄佢哋嘅人類報復。而喺2026年開幕嘅「神話與怪獸：亞洲的奇幻異境」展覽中，作品會以輪換方式，分三個階段展出手卷嘅前、中、後段，以下描述手卷前段嘅畫面。

手卷前段描繪一隻巨型蟾蜍好吃力咁拉住一架日式雙輪木頭轎車，蟾蜍隔離有一隻大青蛙，似乎從旁協助緊佢。一個巨大嘅人頭伸出車廂，呢個人頭屬於一位叫天狗嘅老翁，佢有一張紅紅嘅臉，一個長長嘅鼻，一對彎彎嘅眼睛，滿腮白鬚。天狗眉飛色舞，張口大笑，以一對巨大嘅獸爪捉住車門。從側面嘅車窗可見，車內亦有一位大頭闊面嘅女士，佢露齒一笑，望向車外。呢架車後面，有四隻妖怪步行跟隨，佢哋着住日本古代服飾，似乎急忙趕路。其中一隻妖怪嘅頭部係一隻黑色嘅平底鑊，鑊底穿咗一個窿，就好似擘大嘅嘴巴。呢班妖怪後面，有一間位於路邊嘅破廟，只見前庭破爛不堪，廟內有燭台鬼、紅臉木魚怪、單眼塵拂、有爪嘅日式竹篋等等。

巡遊隊伍上，有其他外型、姿態各異嘅妖怪。有一隻妖怪嘅頭部似茶煲，佢左手叉腰，同人一樣用雙腳行走；亦有一隻妖怪好似斷弦嘅琴，佢赤腳露出指爪，同動物一樣用四肢爬行。妖怪身上衣服嘅線條都以細膩筆觸描繪，呈現出趕路時衣袖揚起嘅細節，睇起嚟生動活潑。