佚名 小童絲綢袍服

（配音）賀祈思：

我叫賀祈思。呢件龍袍係我嘅藏品，我收藏咗好多中國古代嘅紡織品，而呢件就係傳統中國龍袍。

當初買呢件龍袍嗰陣，有人話我知，佢係特別為末代皇帝溥儀嘅細佬溥傑而訂造嘅。呢件龍袍象徵住整個宇宙：最下面嘅斜紋代表大海，大海上方係陸地同山嶽；再往上就係天空，巨龍喺雲霧之間盤旋，追逐代表智慧嘅寶珠。

龍係一種力量強大嘅神獸，同時佢亦好慈祥，會庇佑自己嘅子民，所以龍係最適合象徵皇帝嘅圖騰。

大多數畀皇帝同官員着嘅龍袍上面都繡有九條龍：前面三條、後面三條，兩邊膊頭各一條，仲有一條藏喺衣襟入面，加埋啱啱好九條，喺中國傳統入面係一個吉祥嘅數字。但係呢件袍上面得八條龍，偏偏少咗衣襟入面嗰條。咁就證明呢件袍並唔係畀皇帝或者朝廷官員着，而係畀未成年嘅男仔或者年幼嘅皇子着嘅。

呢件小童絲綢袍服係由不知名嘅工匠喺十九世紀製作嘅紡織品，從領口到袍腳嘅長度約75厘米，袍腳闊約60厘米，主要物料係真絲。

呢件藍、金色長袍相信係屬於一位十三歲嘅中國皇族少年，袍服款式為圓領右衽大襟襯金線盤扣，配上馬蹄形袖口，下擺採用四開衩設計。深藍色袍身上綴以金線刺繡，繡有四爪金龍、彩雲同山河嘅紋樣。

由上而下睇呢件長袍，圓領口同馬蹄袖都鑲有一粗一幼嘅石青色雙滾邊，幼邊上繡有寓意吉祥嘅花卉同金錢紋樣，而粗邊嘅闊度約係幼邊嘅四倍，以金線繡上幾條金龍踏住雲彩騰飛嘅模樣，天上有旭日，下方有海浪。袍嘅兩肩位置各繡有一條完整嘅金龍，而前襟就有三條，一條喺上方正中，另外兩條就喺下方，各據左右。正中央嘅大金龍正面朝外，結實嘅龍身呈蛇形，由扇形嘅鱗片組成，加上粗壯嘅指爪，睇起嚟就似向住我哋張牙舞爪。大金龍下方嘅左右兩邊各繡有一條打側身嘅金龍，佢哋長長嘅龍鬚卷曲朝上，展現金龍喺彩雲間向上騰飛嘅活潑姿態。呢幾條金龍嘅身邊都圍繞住火紋、雲紋、花卉同埋蝙蝠等寓意吉祥嘅紋樣。長袍嘅下襬為前後左右四開衩，繡有扇形嘅曲水紋，似波浪起伏，左右兩邊各有一條金龍探頭出海面，濺起一朵朵浪花，令金龍嘅形態非常生動。海浪下方用金線鏽上斜紋，以前面嘅開裾為中軸線，左右對稱咁向下斜。

長袍上嘅金線刺繡繡工繁瑣又精細，喺柔光下顯得亮麗而有厚度。