岡上淑子 《 獵物 》

譚雪凝：

我係M+視覺藝術策展人譚雪凝，亦係今次「神話與怪獸：亞洲的奇幻異境」展覽嘅聯合策展人之一。呢件作品叫《獵物》，係日本藝術家岡上淑子喺1955年創作嘅。

第二次世界大戰之後，美國商品同大眾文化响日本廣泛傳播，所以岡上接觸到《時尚》（Vogue）同《時尚芭莎》（Harper's Bazaar）呢類展示最新時尚趨勢嘅雜誌。佢從呢啲雜誌剪出唔同嘅素材，創作咗呢件攝影拼貼作品。

岡上嘅藝術生涯非常短暫。佢原本立志成為時裝設計師，但佢真正從事藝術創作嘅時間，其實只有1950年代初到1956年短短幾年。呢件作品正正係佢藝術生涯後期嘅創作。之後，佢就嫁咗人。當時社會期望女性應該安分守己，做個家庭主婦同媽媽，令佢不得不放棄對藝術嘅追求，佢因為咁而非常沮喪。

岡上將自己理想中嘅自我形象同事業藍圖投射咗落呢幅作品入面，同佢現實生活嘅遭遇形成鮮明對比。乍看之下，呢幅攝影拼貼令你以為自己注視緊一位美麗動人嘅女士，但其實內裏暗藏矛盾：畫面中間嘅女士望落滿懷希望，但佢身後有一個個支離破碎嘅身軀同一張張憂傷嘅面孔。

當時包括岡上在內嘅好多藝術家，都嘗試喺各自嘅環境入面實踐超現實主義。藝術家可以喺黑房做各種實驗，創造出呢種極具超現實色彩嘅影像。而且 因為作品嘅尺寸細小，好容易流傳出去。攝影為佢哋開闢咗一片空間，畀佢哋抒發內心嘅焦慮同情感，甚至回應當時嘅現實情況。

呢件作品嘅名稱係《獵物》，係岡上淑子喺1955年創作嘅單色攝影拼貼，由一幅幅來自時裝雜誌嘅攝影圖像剪貼而成。作品高約25厘米，長約26厘米。

作品嘅場景設定喺沿海嘅淺水區，海上有一架拖車，車上坐咗一位年輕女子，佢岳高頭望向畫面左邊，與此同時，幾條魚躍出海面，咬住女子嘅手套同裙擺。女子身後有一排木柱，最左邊嘅木柱柱頂有一塊告示牌，以英文寫上「No Right Turn」，即係「不准右轉」嘅意思。木柱同木柱之間掛起咗一張張漁網，網裏面卡住一個只有上半身嘅人，佢張開雙臂、仰望天空，隔離有另一個人用雙手揞住塊面，遠處仲有一對腳倒插喺網中。年輕女子、魚同埋其他人嘅輪廓分明，顯然係剪貼出嚟嘅圖像。成幅畫面呈陰沉嘅啡黃色。

仔細睇，拖車以剪影呈現，望落似木製，由牛馬之類嘅動物拉住。車上嘅年輕女子有一頭俐落嘅短髮，着露肩低胸嘅白色禮服裙，胸口同裙擺都有分層嘅波浪形設計，睇起嚟似1950、1960年代嘅打扮。佢身形纖瘦，一邊優雅地拎起裙邊，一邊抬頭望向畫面嘅左邊，神態平靜而抽離，似乎未有理會幾條大魚正躍出海面，濺起水花，咬住佢嘅手套同華麗嘅裙擺。拖車深色嘅影子同女子身上嘅白色裙形成強烈對比，佔據作品嘅中央位置。 

天空好似刮起大風，雲朵嘅邊緣參差不齊，猶如一絲絲綿絮。呢個靜止嘅場景略帶詭異，瀰漫住不平和嘅氣息。