成田亨 《格支魯》

（配音）奧脇嵩大：

我叫奧脇嵩大，係青森縣立美術館嘅策展人。

成田亨係一位雕塑家、插畫師同美術指導。佢因為從事電影同電視劇嘅特攝美術工作而出名，但講到佢最廣為人知嘅事跡，就係為電視劇《超人》（俗稱咸蛋超人）系列設計角色。佢設計嘅英雄、怪獸同外星人，對戰後日本嘅流行文化產生咗深遠嘅影響。

成田亨喺武藏野美術大學修讀雕塑。當佢仲喺學校讀書嗰陣，就接咗電影《哥斯拉》嘅製作工作。為咗生計，佢從此踏入電影美術嘅世界。

喺片場工作期間，成田亨結識咗後來被尊稱為「特攝之父」嘅圓谷英二。成田亨喺圓谷製作嘅其中一套電視劇入面負責設計怪獸同外星人，正正喺呢個時期，佢一手創造出超級英雄「超人」。

當時，劇集嘅編劇要求成田亨設計一個前所未見嘅外星人，希望呢個角色喺視覺上夠搶眼、震撼而且美觀。對成田亨嚟講，咁意味住佢嘅設計必須夠簡潔。所以佢第一步做嘅，就係拎走角色造型上一切多餘嘅裝飾，只係保留最核心嘅元素。

設計角色嗰陣，成田亨時刻思考緊點樣將唔同嘅元素完美結合。無論佢去到邊都會隨身攜帶一本厚厚嘅生物圖鑑，時時刻刻喺度尋找獨特嘅生物形態同輪廓。

大自然係佢設計怪獸嘅重要靈感泉源。佢會仔細觀察密密麻麻嘅葉脈紋理、魚鱗、貝殼，仲有甲蟲堅硬嘅外殼。

透過融入大家平時見慣見熟嘅動植物形態，成田亨嘅設計具有獨特嘅視覺魅力。佢運用所有人一眼就認得出嘅元素，但以全新嘅方式將佢哋重新組合。佢筆下每一個角色嘅形態，都展現出意想不到嘅可能。

呢件作品嘅名稱係《格支魯》，係成田亨喺1970年代創作嘅水彩紙本，採用直度構圖，高約52厘米，長約36厘米。

格支魯係一隻外星怪獸嘅名，佢係日本特攝電視劇《突擊！Human！！》入面嘅角色。呢幅水彩畫描繪格支魯企喺度，而佢身後嘅城市陷入火海。

從畫中可見，格支魯有怪獸嘅頭部、人形嘅身體。佢嘅面部似乎係由一對向上豎起嘅尖耳朶構成，眼睛分別藏喺兩隻耳嘅耳窩入面。佢個鼻又扁又短，鼻嘅下方係一個大嘴，露出一排疏疏落落嘅牙齒。佢條頸以下就係人形嘅身驅，好似披上戰鬥裝甲，裝甲漆上不規則嘅紅、藍、黃色條狀紋，胸腹位置有金黃色條狀紋，沿胸骨同肋骨呈「人」字。佢右手握拳，舉到心口咁高。左臂似係接駁住一支鉗。怪獸嘅雙腿同樣着上裝甲，裝甲分成一截截，每截都呈山形，分別漆上金黃色、綠色、藍色、深藍色、紅色等。佢嘅雙腳着住銀白色短靴。

怪獸身上有又硬又直嘅黑色毛髮，毛髮顏色深淺有致，生得好密集，由兩隻耳仔延伸到頸側，由腋下到腰，再由臀部到膝蓋後方。怪獸嘅身型望落好巨大，大約有三幢摩天大廈咁高，佢身後嘅大樓攔腰斷裂，搖搖欲墜，遠方嘅樓宇東歪西倒。焚燒嘅大樓冒出白煙，背景盡處瀰漫啡黑色嘅煙，遮蔽咗日光同部分藍天。