李命進 《仙境傳說》第一卷（韓文）

（配音）庾水敬：

我叫庾水敬，係京都精華大學嘅教職員，同時亦喺國際漫畫研究中心工作。

「日本漫畫」特指喺日本本土發展、同日本媒體文化有緊密聯繫嘅漫畫作品。雖然日本漫畫具備漫畫嘅基本特徵，但好多日本漫畫作品都擁有其他漫畫少見嘅特質。例如，利用分格嚟刻畫角色嘅內心世界。

當大家討論日本漫畫點樣風靡全球嗰陣，通常都會以歐洲同北美為例子。但事實上，日本漫畫好早就已經開始喺韓國、台灣甚至香港等等嘅東亞地區流行。

世界各地開始不斷湧現非日本籍嘅「日本漫畫家」，即係專門創作日式漫畫嘅藝術家。佢哋借用日本漫畫嘅視覺語言同敘事風格，嚟講述屬於自己嘅故事。有啲人創作出同實際國家或者地區無關嘅奇幻作品；亦有啲人利用漫畫呢種形式，去講述深植於自身文化嘅故事。例如喺非洲，你會見到有啲藝術家透過漫畫，去呈現當地嘅神話同社會議題。

從1990年代開始，日本動漫翻譯成法文，傳入非洲嘅法語區；同時亦翻譯成西班牙文，喺整個拉丁美洲吸引咗大批讀者。

最令我着迷嘅係，每個地區一方面吸收日本漫畫嘅形式，另一方面亦會以自身文化為濾鏡，重新塑造日本漫畫，令佢煥發出全新嘅生命力。

呢本韓文漫畫係《仙境傳說》第一卷，由漫畫家李命進喺1998年創作，由大元C.I.出版。漫畫書高約26厘米，長約18厘米，紙本印刷。

漫畫嘅封面係彩色嘅，以俯瞰視角描繪一身戰士裝束嘅男主角查爾斯。封面上半部分印有借用挪威語嘅漫畫標題《Ragnarök》，字型線條硬朗，似用刀刻出嚟；挪威語標題下方有韓文標題「라그나로크」，以及用英文寫上嘅副標題「Into The Abyss」，即係「沉入深淵」嘅意思。封面左上角印有英文「Champ Comics」嘅細字，代表大元C.I.旗下嘅漫畫雜誌，而右下角有數目字「1」，說明係漫畫嘅第一卷，「1」字下方以韓文印有作者李命進個名。

封面上嘅主角望落好後生，有一頭橙紅色短髮，一條條頭髮好似火舌咁上揚。佢有兩條向上斜嘅橙紅色眉毛，眼神銳利，笑容帶有一絲挑釁。佢身型健碩，滿身肌肉，膞頭上着住厚重嘅白色護肩，護肩嘅左邊明顯有一個畀利刃劃過嘅破口，護肩下方係帶有皺摺嘅綠色戰袍，而戰袍裏面着住啡色緊身衫，顯露男主角胸膛同手臂嘅肌理。佢嘅前臂同雙腳都戴上白色護甲，左側腰間佩戴一把日式武士長刀。主角身邊似乎有一隻身軀龐大嘅白色怪物環繞住佢，怪物身上同尾巴上長有鱗片而且帶刺。加上主角嘅左手緊握怪物嘅斷爪，上面留有打鬥嘅血跡，令畫面睇起嚟有強烈嘅壓迫感。