手塚治虫 阿童木發條玩具

張淑嫻：

我叫張淑嫻，啲人叫我做嫻姐。

我哋喺1994年就開始做玩具。我哋去日本入貨，睇好多小飛俠嗰啲嘢。我啲客人好多都話想買，但係太貴啦。喺2016年嗰時候就撞啱個機會攞license（授權）去做玩具，咁就同埋粉絲一齊研究做靚佢。出咗嚟效果又好好，咁就一路做。小飛俠喺全世界有好多粉絲，男仔又有，女仔又有。其中有個最特別，嗰個客人呢，佢有個罕有病，但係佢就全靠小飛俠支持佢，對住啲小飛俠就好開心。佢話小飛俠係佢嘅生命，出入醫院都係拎住小飛俠。

其實而家《小飛俠》係橫跨幾代人，我有啲客人都七十幾歲，因為以前成日睇佢嘅電視長大，而家有能力又見到有嗰啲公仔，就即刻買，買返個童年回憶。而家做咗阿爺嗰啲，又話同啲孫一齊睇《小飛俠》，大家有咗共同話題。

有次有個細路同嗲吔一齊行我舖頭，嗰個細路話：「嗲吔，呢隻公仔阿嫲鐘意，你買個畀嫲嫲啦。」我問佢，你嫲嫲幾歲？佢話八十幾啦。我覺得好特別，咁你都記得！

呢個阿童木上鏈玩具，係手塚治虫筆下漫畫《小飛俠阿童木》嘅周邊商品，喺1960年推出，高35厘米，長20厘米，闊9厘米，主要物料為金屬。

阿童木嘅外表似人類小男孩，實際上佢係一個機械人。而喺2026年開幕嘅「神話與怪獸：亞洲的奇幻異境」展覽中，一共展出40件大大細細嘅阿童木玩具，呢件上鏈玩具就係其中之一。呢個玩具版本嘅阿童木有一副娃娃臉，面圓圓，眼大大，眼珠黑白分明，望向同一方向。眼眶上方有一條條幼細嘅眼睫毛，令佢嘅眼神更加精靈。佢亦有兩道彎彎嘅眉毛、一個精巧嘅小圓鼻、一張微微彎向上嘅嘴，笑容親切友善。佢有一頭貼服嘅露耳短黑髮，頭上嘅左邊同埋右邊分別有一高一低嘅圓錐形尖角，髮際線有一個美人啄，落喺眉宇之間，線條俐落。佢嘅軀幹略為扁平，戴上紅色腰帶，着綠色短褲，圓柱形嘅雙腳上着住一對及膝圓頭紅靴。佢嘅頸部、肩關節、大腿關節同腳腕有明顯嘅接合線，可以微微轉動。

《小飛俠阿童木》另一常見譯名為《原子小金剛》。