書梅春塞 泰國曼谷亞洲銀行總部（現為大華銀行曼谷總部）（1983–1986）展示模型

藝術家里爾吉．迪拉瓦尼分享呢座位於曼谷嘅大樓設計，點樣啟發佢創作漫畫《移動中的城市──曼谷》。

（配音）里爾吉．迪拉瓦尼：

我叫里爾吉．迪拉瓦尼，係一個藝術家。

呢本漫畫係一件大型作品嘅一部分，曾經喺一個展覽入面展出，嗰個展覽叫做「移動中的城市」，當時阿運．拉挽猜哥同我獲邀以藝術家身分參展。

嗰次展覽探討城市化、建築，以及城市點樣不斷演變同變遷。我哋當時關注嘅係曼谷嘅城市化進程。

呢本漫畫嘅靈感源自泰國本地嘅平價漫畫書。通常呢類漫畫……比起日本漫畫嚟講會顯得粗糙少少，內容多數係啲怪談同鬼故，啱呀可？因為呢類題材充滿奇幻色彩，唯一能夠呈現佢哋嘅方法，就係畫成漫畫，或者拍成電影。

「機械人大樓」係曼谷一座標誌性嘅建築。佢之所以叫機械人大樓，係因為佢嘅外形睇落好似一個巨型機械人。佢係由泰國一位著名建築師兼藝術家設計嘅，佢叫書梅春塞。我哋當時好想為呢個巨型機械人賦予生命，令佢變得活生生。

喚醒呢隻以建築物為主體嘅怪獸，呢個概念其實有幾分似哥斯拉。我諗呢個亦係我哋當初選擇以呢座大樓作為創作主題嘅原因之一。

呢個泰國曼谷亞洲銀行總部（現為大華銀行曼谷總部）展示模型喺1990年製作，由塑膠、合成聚合物顏料同膠紙製成，高約52厘米，長約31厘米，闊約23厘米，體積大約係登機行李箱咁大。模型依照建築師書梅春塞設計嘅銀行大廈製作，而大廈本身喺1983年興建，1986年落成。

模型嘅外貌似玩具坦克機械人，上窄下闊，頭、胸、腹嘅線條方正，立面以藍色同黑色為基調，側面就以米白色同黑色為主。

機械人嘅頭頂有一對黑色避雷針，眼睛係兩扇並置嘅圓形大窗，上半圓係百葉窗，下半圓係反光玻璃，好似眼皮蓋住一對靈動嘅大眼睛。 機械人嘅胸腹採用藍、黑色玻璃幕牆設計，下腹中央係大樓出入口，延伸出四對藍色門形支架。機械人左右兩側各有一道凸起嘅黑色條紋，由上而下貫穿，黑色條紋上面同埋外側有大大細細嘅螺絲帽。另外，左側嘅底部有四個排成一排嘅巨形窗，每扇窗呈八角形，而窗嘅外圍被遮光嘅虛線包圍，就好似坦克嘅履帶咁。右側底部嘅設計相近，只係中間兩扇窗加上凸出嚟嘅簷篷。所以，機械人睇起嚟就好似兩側都有坦克履帶，隨時可以移動咁。