收聽
© Philippe Parreno
（配音）貝若蘭：
我叫貝若蘭，係M+流動影像策展人，亦係「神話與怪獸：亞洲的奇幻異境」展覽嘅聯合策展人之一。
《任何地方》係法國藝術家菲利普・帕雷諾喺2017年創作嘅3D動畫。你喺螢幕上面見到嘅角色叫安麗。2000到2002年間，帕雷諾同另一位法國藝術家皮耶．雨格合作發起《沒有靈魂 ，只有軀殼》項目，而安麗就係為咗呢個項目而創造嘅動畫角色。
《任何地方》同經典動畫《攻殼機動隊》息息相關。兩者都探討身分認同同人造生命嘅議題。喺《攻殼機動隊》入面，綽號「少佐」嘅生化人草薙素子不斷質疑自己到底有冇靈魂；而喺《任何地方》入面，安麗亦喺度反思自己作為人工製造出嚟嘅影像呢個身分——佢只係一個被買賣、被擁有並且被複製嘅角色。呢兩部作品都模糊咗人類同人造生命之間嘅界線，同時探討：意識同身分認同可唔可以存在於數碼軀體之內。
安麗係一個直接從日本流行文化挪用過嚟嘅動漫角色。藝術家透過安麗，展示奇幻元素點樣打破物理世界嘅局限，帶領我哋去探索轉化同蛻變嘅無限可能。
呢件作品嘅名稱係《任何地方》，係菲利普．帕雷諾喺2017年創作嘅彩色、有聲3D數碼動畫錄像，片長6分鐘，觀眾可以佩戴展廳提供嘅3D眼鏡觀看作品。
片中角色叫安麗，佢本身係一個動畫素材，藝術家從網上商品圖錄買咗佢嘅使用版權。安麗嘅皮膚光滑，膚色偏白，有一張瓜子臉，杏圓嘅大眼只有眼眶，無眼珠，配上彎彎嘅幼眉、小巧嘅鼻同埋嘴。佢有一頭紫藍色嘅及肩短髮，中間分界，稍稍露出尖耳。佢着住淺藍色V領上身衫，整體望落似未加工嘅模型。影片內容係安麗 以獨白形式講述自己點樣被創造出嚟嘅故事。
影片由頭到尾都以深沉嘅紫色為背景，而安麗嘅上半身，即係由頭到胸口，會出現喺畫面之中，並且隨住獨白內容而有所變化，例如佢嘅身影時大時細，時近時遠，一時靠左邊，一時靠右邊。安麗嘅獨白提到，佢嘅形象曾經被多位藝術家使用，塑造成唔同模樣，呢個時候，安麗拎起個人照片，俯身靠前，好似對住鏡頭展示照片咁。
安麗表情含蓄，有時面帶愁容。影片結尾聚焦喺安麗嘅面部特寫，佢木無表情，然後淺淺一笑，畫面逐漸變暗，直到安麗消失。