何子彥 《百鬼夜行（三十六隻小妖）》

（配音）何子彥：

我叫何子彥，係喺新加坡生活同工作嘅藝術家。

《百鬼夜行》係我喺2021年創作嘅項目。呢個項目嘗試將日本嘅妖怪概念，同第二次世界大戰期間日本嘅思想史結合埋一齊。

妖怪指嘅係一種特殊生物，介乎於怪獸同幽靈之間。早喺幾個世紀以前嘅古老畫卷入面，就已經見到佢哋嘅身影。但直到近現代，妖怪開始喺浮世繪出現，廣泛流行於民間。喺日本文化入面，日本漫畫同動畫嘅誕生，就係同呢啲浮世繪有直接淵源。好多日本動漫角色其實就係幻化成唔同形態嘅妖怪。

我嘗試虛構出幾隻全新嘅妖怪。其中一隻叫「馬來之虎」，佢原本係喺馬來亞出世嘅日本人，因為家庭變故而淪為亡命之徒。傳聞佢專門劫富濟貧，最後被稱為「馬來之虎」。但係我創作嘅「馬來之虎」可以化身成另一個人——山下奉文將軍。二戰爆發嗰陣，正正係佢率領日軍攻陷馬來亞同新加坡。山下奉文將軍同嗰個大盜一樣，都被稱為「馬來之虎」。

我初初從事藝術創作嘅時候，從來無諗過自己會對歷史感興趣。我只係想理解自己所處嘅世界，想知道點解呢個世界有時咁美好，有時又咁殘酷同荒謬。而我唯一能夠理解當下嘅方法，就係去梳理清楚，事情到底係點樣一步步演變到今時今日呢個局面。

呢件作品嘅名稱係《百鬼夜行（三十六隻小妖）》，係何子彥喺2025年創作嘅裝置，作品包含一部單頻道彩色、有聲嘅動畫，片長約20分鐘，日語旁白，附中、英文字幕。

動畫投影落一塊玻璃上面，玻璃嵌入木櫃，木櫃外型類似木偶劇場，亦似中世紀嘅舊式電視櫃。木櫃有四隻長木腳，木腳圓滑，上粗下幼，令成個木櫃架空離開地面。木櫃長150厘米，高90厘米，深約103厘米，體積大約係洗衣機同乾衣機併埋咁大。木櫃加上櫃腳整體約有一個成人咁高。

動畫展示三十六隻彩色妖怪，大部分都係日本民間傳說中嘅怪獸、幽靈同惡魔，當中有唔少經典角色，例如識變身嘅狐狸、河童、燈籠鬼、土蜘蛛等等。隨住每隻妖怪出現，旁白都會讀出妖怪嘅名稱。

動畫開頭一片漆黑，然後畫面中央逐漸浮現一盞懸空嘅日式燈籠，隨住霹靂拍勒嘅燃燒聲，燈籠亮起一點火光，火光最初忽明忽暗；畫面隨後悠悠轉亮，呢個時候，燈籠頂圈生出啡色頭髮，下方就長出一塊面。呢隻燈籠鬼嘅額頭佈滿皺紋，有一個大鼻、一對寬闊嘅眼睛，由於眼瞼下垂，所以望落一副睡眼惺忪嘅模樣。之後，一縷白煙環繞燈籠，背景傳來清脆嘅鈴聲，燈籠繼而膨脹，幻化成着住紫袍嘅妖怪。呢隻妖怪全身紫紅色，禿頭，眼珠高低唔對稱，大耳尖牙，而且有四對手腳，張牙舞爪。然後，佢嘅身體變成一隻八腳蜘蛛嘅頭胸部，原本嘅人臉就變成蜘蛛脹卜卜嘅腹部。呢隻係變化多端嘅土蜘蛛，棲息喺地下嘅洞穴。佢吐出蜘蛛絲結網，六隻眼睛眨吓眨吓，同時吐出一團團火焰，燒破蜘蛛網。

繼土蜘蛛之後，其他妖怪亦陸續登場。展區燈光昏暗，播放中嘅動畫係黑暗中嘅一道光源，顯得動畫中輪流出現嘅妖怪好似置身喺一個小型劇場之中。動畫播放完畢後，畫面變暗，木框內框嘅四邊亮起燈光，與此同時，展廳上方有射燈打向觀眾，呢個時候，觀眾可以喺玻璃上見到自己嘅倒影。