村上隆 《 白虎及其家族 》

（配音）村上隆：

我叫村上隆，係一位當代藝術家。

呢幾幅畫入面嘅「四象」，係源自古代中國神話同天象學嘅四種神獸。

傳統認為，東方由青龍守護，西方由白虎守護，南方由朱雀守護，而北方就由玄武守護。

喺風水學入面，山川地貌會影響「氣」（即係能量）嘅流動。如果一塊土地嘅四周圍有呢四種神獸鎮守，就會被視為最完美嘅風水地。

據說咁樣可以驅邪避凶，仲可以招財進寶、保佑健康長壽。

因為我係日本人，亦深受日本漫畫同動畫嘅影響，所以我只係好純粹咁運用日本漫畫風格嘅圖像同埋日本動畫嘅視覺效果——就係咁啫，冇其他特別意圖。

我覺得，當觀眾企喺我嘅作品面前，我希望佢哋聯想到嘅嘢，同外國遊客去到神社或者寺廟、見到龍同老虎圖案嗰陣冇乜分別——即係同樣假設呢啲動物係神話裏面嘅神獸。

對我呢個當代藝術家嚟講，一切都取決於一個重點，就係呢套機制對觀眾起唔起到作用。

所以，畫作喺度，觀眾亦喺度，兩者之間到底能唔能夠展開一場抽象嘅對話，呢個先係關鍵精髓。

至於我哋用咩技巧或者內容去製造呢場對話，某程度上係次要嘅。

我相信最重要嘅事，就係觀眾親身企响畫作面前，完全沉浸其中。

呢件作品嘅名稱係《白虎及其家族》，係村上隆喺2024年創作嘅塑膠彩布本，附閃粉同金箔，採用橫度構圖，高180厘米，長約214厘米，大約係三道門咁大。

呢幅畫描繪東亞神獸白虎一家，遠睇可見三隻有黑色虎紋嘅白老虎，近睇就會發現佢哋身邊或身上仲有好多細小嘅老虎仔，顏色各異，姿態亦各有不同。全部加起嚟總共有十四隻老虎佔據成個畫面。

最大隻嘅白老虎好似趴喺一舊色彩斑斕嘅大石頭上面，佔據畫面上半部分，另外兩隻白老虎嘅體型分別只有大老虎嘅一半，左右並排，佔據畫面下半部分。大老虎嘅前爪拼埋，頭部伏喺指爪之間。佢嘅眉頭一高一低，眉毛濃密厚實，高眉頭嘅一邊瞪眼向上望，低眉頭嘅另一邊就向下望，似有所警覺，虎視眈眈。佢微微擘大口，露出尖牙。

佢下方靠左邊嗰隻白老虎同樣趴喺地下，緊貼地面，弓起嘅背似一座山，佢望向左邊，眼神帶點好奇。右邊嗰隻挺直上身，呈蹲坐姿態，表情似微笑緊，眼神帶點調皮。

其餘嘅老虎仔分散喺呢三隻大老虎嘅頭上、肩上、指爪上，或者喺大老虎身邊。呢十一隻老虎仔一係坐低，一係趴低，有啲成雙成對，靜靜依偎。其中一隻深藍色嘅老虎仔有大老虎嘅前爪咁大，佢坐喺畫面嘅左邊，眼珠朝上，好似反眼咁，擺出一副不耐煩嘅模樣。其餘十隻老虎仔大約只有大老虎嘅半隻爪咁大，佢哋嘅毛髮有白色、深藍色、淡黃色同淡紫色。

呢幅畫用色豐富，構圖採用扁平化風格，毫無立體感。畫面加咗閃粉同金箔，令老虎嘅眼耳口鼻、牙齒、指爪以及成幅畫嘅背景展現出艷麗嘅幻彩色調，亦同大老虎白色嘅身軀形成鮮明對比。

《白虎及其家族》同村上隆另外三幅同系列嘅畫作一齊展示，分別呈現四大神獸：東方青龍、西方白虎、南方朱雀、北方玄武。喺村上隆筆下，所有神獸都好似漫畫角色咁，表情生動帶點誇張。