M+大樓南天台花園。攝影：梁譽聰。M+，香港
旁述：
「室外同室內空間互相呼應」係M+大樓嘅整體設計概念。尤其喺室內嘅公眾空間，無論係透過二樓採光井引入充裕嘅日光，定係地下嘅有蓋半戶外空間，都令喺室內嘅人感覺到自然環境近在咫尺。
喺呢個覆蓋博物館整個平台嘅天台花園，所有嘅展廳都喺你腳下，你亦完全身處戶外。呢個位置，係欣賞M+大樓嘅最佳角度，亦都係我哋獨特嘅LED幕牆所在之地。呢個110米闊、66米高嘅巨型幕牆，絕非一般嘅顯示屏。日頭嗰陣，你未必會留意到呢度有一個屏幕，但其實上面有超過5500盞LED燈，裝嵌喺外牆嘅混凝土支架上，同埋喺波浪型嘅陶瓦之間。每日黃昏六點，就好似變魔術一樣，LED燈亮起，整座大樓好似被賦予生命，隨住LED燈閃動，向公眾展示博物館大樓入面嘅世界。
香港嘅天際線一向坐落住各式各樣嘅廣告牌，而呢幅幕牆係當中嘅新成員。我哋致力用呢幅幕牆同香港人分享視覺文化，展示M+藏品或者最新委約嘅創作。無論夜晚喺一公里以外嘅香港島遠望，定係黃昏時分喺藝術公園近觀，呢個設計確保喺任何角度同照明條件下，畫面都清晰可見。
如果你喺M+天台花園呢度結束建築導賞，記得留番啲時間，喺呢個平台上面欣賞美麗嘅花園同維港全景。我哋希望你享受呢個導賞，並且對M+博物館嘅空間佈局有多一重體會。建築團隊為香港創造呢個獨特、嶄新嘅公共空間，喺呢座城市裏面絕無僅有。當中廣大嘅面積、寬敞嘅公共空間、開揚嘅景觀、加上內外空間嘅連結，締造出一座令人驚喜不斷嘅博物館，希望未來你會繼續嚟呢度發掘更多。
再見。