M+大樓地下大堂。攝影：梁譽聰。 M+，香港
旁述：
歡迎嚟到M+。
你依家身處嘅大樓，係香港最獨特嘅建築物之一，你可能唔為意佢點解會有咁嘅設計。作為全球數一數二嘅視覺文化博物館，M+收藏咗一系列精彩又充滿動感嘅設計、建築、流動影像同埋視覺藝術作品。如果你想收聽呢啲藏品嘅故事，請喺目錄選擇「精選藏品」。
但係呢座建築本身有咩特別呢？ 打橫係龐大嘅基座平台，足足有兩個足球場咁大，打棟係外形修長嘅大樓，佢地組成一個倒轉嘅「T」字，為維多利亞港增添咗一座奪目嘅地標。喺我哋嘅城市，樓宇通常喺好細嘅空間裏面起到密麻麻、有幾高就起到幾高。而M+嘅設計就反其道而行。建築事務所Herzog & de Meuron創造咗一個廣闊開放嘅博物館大樓，同館內嘅藏品一樣引人注目。
今日，我哋會帶你認識呢個嶄新嘅公共空間。M+係一個可以令你自在咁探索同尋找靈感嘅地方。透過呢個導賞，我哋會幫你熟習呢度嘅環境，話你知有咩亮點可以睇，亦會為你揭示呢座視覺文化博物館背後嘅建築概念。你啱啱行入嚟個陣，有無留意到室外個啲巨型吊燈，造型好似香港街市肉檔嘅紅膠燈咁呢？呢啲都係博物館大樓嘅設計特色，我哋會喺跟住落嚟大約45分鐘嘅建築導賞入面逐一探究。
如果你係第一次嚟，你可以跟住熒幕上出現嘅次序，由地下大堂第二站開始。你亦都可以按自己喜好去發掘唔同空間同設計特色，再收聽相關嘅音訊。
如果你已經準備就緒，我哋建議你喺呢個空曠嘅地下大堂搵一個無咁多人嘅地方，立刻投入M+ 故事嘅旅程。